Փարաջանով սիրելի հոնավոցը. վերականգնված ցուցանմուշի պատմություն

Հայաստանի ազգային պատկերասրահը, շարունակելով «Վերականգնված ցուցանմուշի պատմություն» նախագիծը, ներկայացնում է կինոարվեստի աշխարհում ամենաինքնատիպ և առեղծվածային կերպարներից մեկի՝ Սերգեյ Փարաջանովի սիրելի հովանոցի վերականգնման պատմությունը։
Արվեստագետի թաիլանդական նրբագեղ հովանոցը Սերգեյ Փարաջանովի թանգարանից Ազգային պատկերասրահի Վերականգնման բաժին է հանձնվել 2022 թվականին խիստ անմխիթար վիճակում։ Այժմ, փուլային բարդ վերականգնումից հետո, այն ներկայացվել է այցելուներին։ Փարաջանովի հովանոցի կողքին ցուցադրվում են վերականգնման երկարատև ընթացքը ներկայացնող ամփոփ տեսանյութն ու աշխատանքային լուսանկարներն իրենց բացատրագրերով, ինչպես նաև թեմատիկ այլ ցուցանմուշներ:
Լեգենդար արվեստագետը սիրում էր ամեն տեսակի հնություն․ պաճուճազարդ գլխարկներն ու հովանոցները, տիկնիկներն ու կենցաղային այլազան իրերը նա հավաքում, վերափոխում, վերածում էր արվեստի գործերի և դարձնում իր կախարդական ու հրաշքներով լի աշխարհի կենդանի դերակատարներ։ Իր կյանքի և ստեղծագործության սիմվոլիկ «հերոսներից» մեկն էլ հովանոցն էր: Ինչպես ինքն էր ասում. «Ես ապրում եմ Թիֆլիսում՝ իմ ծնողների հին տանը, և երբ անձրև է գալիս, ես քնում եմ հովանոցով և երջանիկ եմ, որովհետև դա նման է Տարկովսկու ֆիլմերին»։