«ՀՀ-ում կալանավորված անձանց թիվը գերազանցում է դատապարտյալների թվին»․ Զառա Հովհաննիսյան

Հատված՝ Իրավապաշտպան, հրապարակախոս Զառա Հովհաննիսյանի հոդվածից․ «ՀՀ քրեակատարողական հիմնարկներում անազատության մեջ պահվող կալանավորված անձանց թիվը գերազանցում է դատապարտյալների թվին:
Կալանավորման իրավական հիմքերն ու պրակտիկաները Հայաստանում շարունակում են խնդրահարույց լինել և այդ մասին են վկայում ՄԻԵԴ որոշումները: Օրինակ, նույնիսկ եթե անձը եղել է փախուստի և հետախուզման մեջ, և Հայաստանի դատարանը հենց այդ հիմնավորումն է բերել կալաքը երկարացնելու համար, ՄԻԵԴ-ի դիրքորոշումը լիովին հակառակն է: Մասնավորապես Փաշինյանն ընդդեմ Հայաստանի 2022 թվականի ապրիլի 7-ին հրապարակված Մարդու իրավունքների եվրոպական դատարանի վճիռով, որի շրջանակներում քննվել է Նիկոլ Փաշինյանի 2009 թվականի հոկտեմբերի 12-ից 2010-ի հունվարի 19-ը նրան ապօրինի կալանքի տակ պահելու վերաբերյալ դիմումը, ՄԻԵԴ-ն արձանագրել է, որ տեղի է ունեցել Կոնվենցիայի 5-րդ՝ Ազատության և անձնական անձեռնմխելիության իրավունքի խախտում:
Ընդհանուր առմամբ 2018-2022 թթ. Հայաստանի դեմ 19 վճիռ է եղել՝ կապված կալանքի կիրառման հետ, որոնք, իհարկե վերաբերում են նախորդ իշխանության ժամանակահատվածում տեղի ունեցած խախտումներին, այդ թվում՝ Ղավալյանն ընդդեմ Հայաստանի (22․10․2020), Սմբատ Այվազյան ընդդեմ Հայաստանի (08․10․2020), Ոսկերչյան ընդդեմ Հայաստանի (18․10․2018), Շիրխանյան ընդդեմ Հայաստանի (16․05․2022), Ջհանգիրյանն ընդդեմ Հայաստանի (04․11․2021), Գասպարին ընդդեմ Հայաստանի (20․09․2018), Մուշեղ Սաղաթելյան ընդդեմ Հայաստանի (20․09․2018) և այլն: Բայց, ցավոք, պրակտիկաները չեն փոխվում և նման որոշումներ մենք ունենալու ենք նաև հաջողրդ տասնամյակում՝ այսօրվա կալանավորումների վերաբերյալ»: