«Ինչո՞ւ եք դեմ Բենյամին Նեթանյահուի` Հայոց ցեղասպանության դատապարտման հայտարարությանը». Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը․ «Փորձում եմ պատկերացնել գեթ մեկ հրեայի, ով իր դժգոհությունը կհայտներ Իտալիայից, Ավստրիայից կամ Նորվեգիայից Հոլոքոստը ճանաչելու և դատապարտելու համար: Չեմ կարող պատկերացնել, քանզի այդօրինակ հրեա չի գտնվի:
Այսօր հայազգի բնակչության զգալի մասը նախանձելի համերաշխությամբ դատապարտեց Բենյամին Նեթանյահուին Հայոց ցեղասպանությունը դատապարտելու համար: Թե բա՝ Իսրայել, իսրայելական զենք և այլն:
Լավ, հայազգի բնակիչներն ի վերջո ի՞նչ են ուզում: Ուզում են, որ Հայոց ցեղասպանությունը միջազգայնորեն ճանաչվի՞, թե՞ չճանաչվի: Իսկ միգուցե մասա՞մբ ճանաչվի: Օրինակ՝ Ֆրանսիան ճանաչի, իսկ Պակիստանը հանկարծ չճանաչի: Տրամաբանորեն՝ նորմալ ազգերը պետք է ձգտեն, որ իրենց ցեղասպանվելը ճանաչեն հենց ցեղասպանություն իրականացնողները: Եթե շարժվենք այսօրվա տրամաբանությամբ, ապա վստահ եմ՝ հայազգի բնակիչները կդատապարտեն պայմանական Էրդողանին, որը կհամարձակվի ճանաչել Հայոց ցեղասպանությունը: Վերջիններս կասեն, որ «դու իրավունք չունես» և կհիշեն, օրինակ՝ 44-օրյայի բայրաքթարները:
Անկեղծ՝ չեմ հասկանում, թե ինչո՞ւ եք դեմ Բենյամին Նեթանյահուի Հայոց ցեղասպանության դատապարտման հայտարարությանը: Անձնական շա՞հ է հետապնդում: Իսկ ո՞ր պետությունն է ցեղասպանությունը ճանաչել հայերի «բարի աչքերի» համար՝ Բոլիվիա՞ն, Վենեսուելա՞ն, թե՞ Ռուսաստանը: Բոլորն էլ անձնական շահերն են հետապնդել կամ Հայոց ցեղասպանությունը ճանաչել են հայկական հզոր լոբբինգի արդյունքում:
Հիմա, Բենյամին Նեթանյահուից ի՞նչ եք ուզում: Վստահ եմ՝ վերջինս լրիվ անվճար, առանց որևէ լոբբինգի ճանաչեց այն, ինչի համար միլիարդներ եք ծախսել:
Պատկերացնում եմ՝ եթե ցեղասպանության դատապարտման համար Նեթանյահուի հայտարարությանն եք դեմ, ապա ի՞նչ կանեք, որ հանկարծ Հայոց ցեղասպանության փաստը ճանաչի և դատապարտի պայմանական Էրդողանը կամ Ալիևը»: