«Անարդար դատավճիռը հասարակության համար ավելի վտանգավոր է, քան հանցագործությունը»․ Երեմ Սարգսյան

Երևանի առաջին ատյանի ընդհանուր իրավասության քրեական դատարանի Ավան նստավայրում ընթանում է Հայաստանյայց առաքելական սուրբ եկեղեցու Շիրակի թեմի առաջնորդ Միքայել արքեպիսկոպոս Աջապահյանի գործով ամփոփիչ դատական նիստը։ Կողմերը հանդես են գալիս եզրափակիչ ելույթներով։

Միքայել սրբազանի պաշտպան Երեմ Սարգսյանը մանրամասն ներկայացրեց այն խախտումները, որոնք թույլ են տրվել այս քրեական գործով։

«Անարդար դատավճիռը հասարակության համար ավելի վտանգավոր է, քան հանցագործությունը»,- Մոնտեսքյուի այս խոսքերը մեջբերելուց հետո փաստաբան Երեմ Սարգսյանը նշեց․ «Որոշումը կայացնում է նախագահող դատավորը՝ հիմա արդարադատություն կիրականացնեք կամ կենթարկվեք առկա իրողություններին և անհիմն կերպով մեղադրական վերդիկտ կկայացնեք Միքայել Սրբազանի նկատմամբ՝ հստակ իմանալով, որ նա մի օր արդարանալու է․․․ Հորդորում եմ, որ ձեր խղճով ղեկավարվեք»։

«Միջնորդում եմ հռչակել գերաշնորհ տեր Միքայել արքեպիսկոպոս Աջապահյանի անմեղությունը և կայացնել արդարացման վերդիկտ»,- իր խոսքն այսպես եզրափակեց Երեմ Սարգսյանը։

Նշենք, որ դատարանն ընդամենը 20 օրում ավարտել է հիմնական դատալսումների փուլը, և այժմ գործը ավարտական փուլում է։

Դատական հաջորդ նիստը կկայանա սեպտեմբերի 2–ին։