«Հանրագումարում մնալու է սթրեսը»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Հանրակրթական դպրոցներում դասերը կմեկնարկեն 8.15-ին՝ 8.30-ի փոխարեն: Այս «իմաստուն» որոշման բացատրությունը այն է, թե այդպես երեխաները չեն մնա խցանման մեջ, առավոտյան երթևեկությունն էլ կթեթևանա:
Ի՞նչ է փոխելու 15 րոպեն, բացի երեխայի կյանքում անհարմարությունից: Վստահ եմ՝ գործնականում ոչինչ: Երթևեկությունը թեթևանալու է ուղիղ այնքան, որքան թեթևացել է մինչև հիմա քաղաքապետարանի սահմանած մյուս կարգավորումների «արդյունքում»: Իսկ փորձը ցույց է տալիս, որ ինչքան փորձում են կարգավորել, դրանից ավելանում են միայն անհարմարությունները:
Այս անգամ իհարկե որոշել են անհարմարություն պատճառել ոչ թե վարորդներին, այլ երեխաներին, որոնք ստիպված են լինելու առավոտյան արթնանալ առնվազն 15 րոպե շուտ:
Մասնագետ չեմ իհարկե, բայց վստահ եմ, որ երեխաների համար նույնիսկ հինգ րոպե շուտը կարող է դառնալ սթրեսի պատճառ:
Կամ սթրեսի է վերածվելու դպրոց գնալուն պատրաստվելը, քանի որ հարկ կլինի ամեն ինչ անել սովորականից ավելի արագ:
Հանրագումարում մնալու է հենց սթրեսը, որը կառաջացնի դասապրոցեսի վրա ազդելու մեծ ռիսկ»: