Ռուսական երգիծական թատրոնի նախկին տնօրեն ադրբեջանցի Մամեդալի Աղաևը ձերբակալվել է

Ռուսական լրատվամիջոցները գրում են, որ Ռուսական երգիծական թատրոնի նախկին տնօրեն ադրբեջանցի Մամեդալի Աղաևը ձերբակալվել է Ներքին գործերի նախարարության և ԱԴԾ-ի կողմից՝ 20 միլիոն ռուբլու չափով բյուջետային միջոցներ հափշտակելու կասկածանքով։

«Նա (Աղաևը) գրանցվել է՝ որպես անհատ ձեռնարկատեր և կեղծ հեղինակային պայմանագրեր է կնքել իր ղեկավարած թատրոնի հետ։ Այս փաստաթղթերի համաձայն՝ մեղադրյալը, ենթադրաբար, մի քանի ներկայացումների սցենար է ստեղծել և դրանց իրավունքները փոխանցել մշակութային հաստատությանը։ Կատարված աշխատանքի մասին հորինված հաղորդագրությունների հիման վրա տղամարդը ստացել է յուրաքանչյուր հանրային ներկայացման տոմսարկղային եկամուտների չորս տոկոսի չափով եկամուտ», - ասվում է Ռուսաստանի իրավապահ մարմինների հայտարարության մեջ։

Բացի այդ, հաղորդվում է, որ նախկին ռեժիսորի հարազատների հաշիվները սառեցվել են։

1992-ից մինչև 2021 թվականը Աղաևը ղեկավարել է Մոսկվայի ակադեմիական երգիծական թատրոնը։