«Բանվորական անձնակազմը հայ չէ․ կարող են նույնիսկ չհասկանալ հրահանգը»․ Հայկ Դեմոյան

«Այս շինարարության մեջ հանցավոր անփութություն կա»,- Ծիծեռնակաբերդում ակցիայի ժամանակ լրագրողների հետ զրույցում ասաց ՀՑԹԻ նախկին տնօրեն, պատմաբան Հայկ Դեմոյանը՝ անդրադառնալով Ծիծեռնակաբերդի հուշահամալիրի շինարարական աշխատանքներին։

Դեմոյանը մանրամասնեց․ «Քարի բնօրինակ հատվածները ոչ թե համապատասխան շինարարական տեխնիկայի կիրառմամբ են հանվել, այլ արվել է որպես շարքային շինարարական օբյեկտի հանդեպ ունեցած վերաբերմունքով։ Կիրառվել են բիրտ գործիքներ, որի արդյունքում կոտրել են նաև հիմնական կրող անկյունային քարերը։

Ես նկատեցի, որ բանվորական անձնակազմը հայ չէ։ Հայոց Ցեղասպանության հուշահամլիրի տարածքում ԿԳՄՍ նախարարությունը այնքան հետամուտ չի եղել, որ տեսնի, թե ովքեր են պատասխանատու մոտեցում ցուցաբերում հուշահամալիրի հանդեպ։ Այս մարդկանց՝ բանվորներին որ հանձարարություն են տալիս, նրանք չեն հասկանում սա ինչ նշանակություն ունի այս երկրի քաղաքացիների համար։ Տեսա, որ այստեղ բանվորներ են, որոնք հազիվ խոսում են անգլերեն, այսինքն՝ նրանք կարող են նույնիսկ չհասկանալ հրահանգը, թե ինչ պետք է արվի»։