«Անթույլատրելի է միջազգային գանգատների հետքաշումը»․ Արման Թաթոյան

Բռնի անհետացումների զոհերի միջազգային օրվան նվիրված միջոցառման ժամանակ ՀՀ նախկին ՄԻՊ Արման Թաթոյանն անդրադարձավ 44-օրյա պատերազմի հետևանքով անհետ կորած անձանց առնչվող մի շարք հարցերի։ Նրա խոսքով Ադրբեջանն ամեն ինչ անում է, որպեսզի միջազգային մեխանիզմները չգործեն և չկատվեն միջազգային պարտավորությունները։
«Ադրբեջանն ամեն ինչ անում է, որպեսզի խնդիրները դուրս մղի միջազգային հանրության աչքից»,- ասաց Թաթոյանը։ Նա մեջբերեց ՀՀ-Ադրբեջան նախաստորագրված համաձայնագրի հետևյալ դրույթը․ «Կողմերը պարտավորվում են հասցեագրել երկու Կողմերի ներգրավմամբ զինված հակամարտությունում անհայտ կորած անձանց և բռնի անհետացումների դեպքերը, այդ թվում՝ ուղղակիորեն կամ հարկ եղած դեպքում համապատասխան միջազգային կազմակերպությունների հետ համագործակցությամբ այդ անձանց վերաբերյալ առկա բոլոր տեղեկությունների փոխանակման միջոցով»։
Թաթոյանի խոսքով սույնով հարցը տեղափոխվում է երկկողմ հարթակ՝ չեզոքացնելով միջազգային մեխանիզմները։ Նա անթույլատրելի համարեց նաև միջազգային գանգատների հետքաշումը՝ մեջբերելով համաձայնագրի մեկ այլ դրույթ․ «Համաձայնագիրն ուժի մեջ մտնելուց հետո մեկ ամսվա ընթացքում Կողմերը հետ կկանչեն, կչեղարկեն կամ այլ կերպ կլուծեն որևէ իրավական հարթակում ներկայացված ցանկացած և բոլոր միջպետական ​​հայցերը, գանգատները, բողոքները, առարկությունները, վարույթները և վեճերը, որոնք վերաբերում են մինչև սույն Համաձայնագրի ստորագրումը Կողմերի միջև գոյություն ունեցած խնդիրներին, և չեն նախաձեռնի այդպիսի հայցեր, գանգատներ, բողոքներ, առարկություններ, վարույթներ և որևէ կերպ չեն ներգրավվի որևէ երրորդ կողմի կողմից մյուս Կողմի դեմ ներկայացվող գանգատներում, բողոքներում, առարկություններում, վարույթներում։ Կողմերը դիվանագիտական, տեղեկատվական և այլ ոլորտներում որևէ կերպ չեն իրականացնի, խրախուսի կամ ներգրավվի միմյանց նկատմամբ սույն Համաձայնագրին հակասող թշնամական գործողություններում և կանոնավոր խորհրդակցություններ կանցկացնեն այդ նպատակով»։
Թաթոյանի խոսքով ըստ այդ դրույթի իրավունքների պաշտպանությունը կարող է դիտարկվել որպես թշնամական գործողություններ։