«Պարտադիր պետք է լինի իրավական գնահատական»․ Քրիստինա Վարդանյան

Երևանի ավագանու «Ազգային առաջընթաց» խմբակցության անդամ Քրիստինա Վարդանյանի ֆեյսբուքյան գրառումը․ «Ցավալի է, որ բոլորս ականատեսն եղանք համայն հայության համար ամենազգայուն թեմայի՝ Հայոց ցեղասպանության հուշահամալիրի վերանորոգման հարցին դրսևորած ոչ պրոֆեսիոնալ, ազգային պատվարժանության նկատմամբ փնթի վերաբերմունքի, ինչի արդյունքում ստացանք այն պատկերը, որն այժմ ունենք։
Հանրային աղմուկի առաջին օրը Ծիծեռնակաբերդում էի, որտեղից կապ հաստատեցի Հուշահամալիրի ստեղծման համահեղինակ՝ ՀՀ վաստակավոր ճարտարապետ Սաշուր Քալաշյանի հետ։ Այն ժամանակ նա վստահեցրեց ինձ, (ես էլ ուղիղ եթերի ընթացքում փոխանցեցի բոլորիդ), որ անձամբ ամենը վերահսկում է, աշխատանքն ընթանում է ըստ իր հեղինակած նախագծի և աղմուկը բացարձակապես անհիմն է…
Սակայն վերջին հարցազրույցում պարոն Քալաշյանը բողոքեց, որ շինարարական կազմակերպությունը չունի պահանջվող փորձը, նրանք ռեստավրատորներ չեն, աշխատանքի վերահսկողությունը շատ թերի է…
Փաստորեն ստացվեց, որ հանրության բողոքը շատ տեղին էր։ Հանդիպել և քննարկել եմ հարցը Վան Խաչատուրի տիկնոջ և Արթուր Թարխանյանի դուստր՝ ճարտարապետներ Արփռնիկ Ղազարյանի և Անահիտ Թարխանյանի հետ, հանրայնացրել եմ նրանց խիստ բացասական հարծիքները կատարվածի մասին։
Հատուկ նշում եմ, որ հարցը քաղաքական դաշտ տեղափոխելուն դեմ եմ, դա վնասում է խնդրի լուծմանը։ Ավելի քան համոզված եմ, որ ականատեսն ենք հանցավոր աստիճանի անպատասխանատու վերաբերմունքի ՀՀ պետական կարևորագույն հուշարձանին, մեծ թերություններով կազմված տեխնիկական առաջադրանքի, որտեղ մույթերի բազալտե քարերին արժանի վերաբերմունքը պետք է գրագետ ձևակերպված լիներ, ինչը կբացառեր ռեստավրացիայի կանոնների կոպտագույն խախտումները, փնթի և առանց պահանջվող փորձառության շինարարական աշխատանքների, վերահսկողության բացակայության և տասնյակ այլ հարցերի…
Դիմում եմ խնդրանքով հարցի հետ հապված պետական բոլոր մարմիններին, օր առաջ դադարեցնել տեղի ունեցողը, գրագետ կահավորել շինհրապարակը, ծածկել և պաշտպանել «վերքերի» բացված մակերեսը վնասող ուլտրամանուշակագույն ճառագայթներից, քանզի Ծիծեռնակաբերդի հուշահամալիրը բոլորիս համար սակրալ վայր է, նաև մեր երկրի և հայ ազգի մասին պատմող տուրիստական ամենահաճախ այցելվող վայրերից մեկը։
Ես մեր վիրավոր Հուշահամալիրի նկարը չեմ տեղադրում և լիահույս եմ, որ կարվի ամենը, իրավիճակը շտկելու համար։
Սակայն պարտադիր պետք է լինի նաև իրավական գնահատական՝ պարզելու և պատժելու համար։ Շատ կարևոր է․ ո՞մմ անպատասխանատվության պատճառով հնարավոր եղավ այս արարքը, ինչո՞ւ քանդվեցին երեք մույթերի քարերը, միթե առաջինի հետ աշխատելուց հետո, մասնագետները կոպիտ խախտումները չնկատեցին…
Նկարում՝ հուշահամալիրի հեղինակային թիմի ավելի քիչ հայտնի, բայց ստեղծման մեջ մեծ ավանդ ունեցող Վան Խաչատուրն է՝ առաջին մույթի շարվածքի առաջին քարի «վայրէջքի» օրը, քարի կողքին կանգնածն է…»։