133 հազար դոլար` ԱԺ-ն անցյալից զրկելու համար. «Ժողովուրդ»

«Ժողովուրդ»-ը գրում է. «Ազգային ժողովի հայտնի Ոսկեզօծ դահլիճը այլեւս ոսկեզօծ չէ. այն պարզապես նորաձև և մոդեռն վերանորոգմամբ մի սովորական դահլիճ է՝ զրկված անցյալի պատմությունից և դիզայնից:
Ամառային արձակուրդներին Ազգային ժողովը դարձել էր մեծ շինհրապարակ. վերանորոգվում էին Ոսկեզօծ դահլիճը, Փոքր դահլիճը և Փոքր դահլիճին կից նախասրահը։
Ուսումնասիրել էինք ԱԺ գնումներն ու արձանագրել է, որ այս դահլիճների վերանորոգման համար վճարվել է շուրջ 50 մլն 988 հազար դրամ՝ գրեթե 133 հազար ԱՄՆ դոլար։

Այս գումարը ներառում է Կատարողի կողմից իրականացվող բոլոր ծախսերը։

Ըստ պայմանագրի՝ «իրականացվել է հաճարե մանրահատակի մաքրում, հղկում՝ ձեռքի էլեկտրական գործիքով, նաև նույն հատակի ներկում ջրասոսնձաէմուլսիոն նյութով:
Կատարվել է կախովի առաստաղի մոնտաժում, ներկում, 4 փայտե շրջանակով պատուհանների կազմաքանդում, նույնի վերանորոգում և վերատեղադրում ու այլ աշխատանքներ»։

Պայմանագիրը կնքվել է «ԱՎԱԳ-ՇԻՆ» ՍՊԸ-ի հետ այս տարվա հուլիսի 1-ին։ Ընկերությունը դեռ 2011 թվականին հայտնվել էր մամուլի դիտակետում, երբ Երևանի կենտրոնում՝ Նալբանդյան 106/1 հասցեում, քանդել էր թիվ 1 մանկապարտեզը, երեխաների խաղահրապարակը, ավերել բակային կանաչապատ տարածքը, իսկ փոխարենը պետք է կառուցի բազմաֆունկցիոնալ շենք: Բայց սրանք ԱԺ աշխատակազմի ղեկավար Դավիթ Առաքելյանի համար թերեւս մանրուքներ են: Կարեւորը՝ այս դահլիճների կահավորման համար Ազգային ժողովը ևս մեկ պայմանագիր է կնքել «Արտաշես Պետրոսյան» Ա/Ձ-ի հետ։

40 մլն դրամ արժեքով գնվել է 2 դահլիճների և նախասրահի համար նախատեսված կահույք՝ աթոռներ, սեղաններ, ամբիոն. փոխվել են նաև օդորակիչները և դարձել ներկառուցված։

Թվում է, թե ոչինչ չկա, սովորական գնում է, սակայն տարիների պատմություն ունեցող Ոսկեզօծ դահլիճը, որը սլավոնական, նապոլեոնյան ռոկոկո-բարոկո ոճի վերանորոգում էր հիշեցնում, այլևս չի առանձնանա իր ինքնատիպությամբ»: