«Մեկ ամսվա ընթացքում որոշում կլինի՝ երբ է փակվելու «Նուբարաշեն» ՔԿՀ-ն»․ Սրբուհի Գալյան

Որոշում ունենք մոտ ապագայում ունենալ տեսահսկվող խցեր՝ ինքնավնասման կամ ինքնասպանության հակում ունեցող անձանց համար։ Այս մասին հայտնել է ՀՀ արդարադատության նախարար Սրբուհի Գալյանը՝ լրագրողների հետ ճապազրույցի ժամանակ։ «Դեռ կարիք ունենք հավասարակշռելու անձնական կյանքի գաղտնիության իրավունքը և կյանքի իրավունքը իրար հետ, որպեսզի ճիշտ բալանսը գտնենք, թե որ պահից և երբ տվյալ անձանց պետք է տեղափոխել համապատասխան խցեր»,- ասել է նախարարաը՝ հավելելով, որ առողջապահության նախարարության հետ կատարվում են համապատասխան աշխատանքներ՝ հոգեկան խնդիրներ ունեցող անձանց պատժի կրման համաչափության, նաև նման անձանց պատժի կրումից ազատելու հետ կապված։ Իսկ մահվան այլ դեպքերը, ըստ նախարարի, պատերից դուրս էլ գոյություն ունեն։ Դիտարկում եղավ, թե ահազանգեր են լինում նաև բանտարկյալների պահման պայմանների վերաբերյալ, «խոզանոց»՝ ինչպես Միքայել Սրբազանն է գնահատական տվել։ Նախարարն ի պատասխան ասաց, թե այդ ուղղությամբ կատարվել և ընթանում են մի շարք աշխատանքներ՝ սկսած շուրջօրյա ջրամատակարարման ապահովումից, վերջացրած առանձին խցերի վերանորոգումը, իսկ «Աբովյան» քրեակատարողական հիմնարկը գրեթե ամբողջությամբ վերանորոգված է։ «Հիմա մենք փորձաքննություն ենք իրականացնում «Նուբարաշեն» քրեակատարողական հիմնարկում, որպեսզի վերջնական պատասխան տանք այն հարցին, թե ի վերջո երբ է փակվելու այդ հիմնարկը. մեկ ամսվա ընթացքում կունենանք վերջնական որոշում, ինչը կնշանակի, որ մենք պետք է ունենանք այլընտրանքային ՔԿՀ»,- նշել է Գալյանը։