«Անվստահության գործընթաց է պետք սկսել նաև Վահագն Խաչատուրյանի նկատմամբ»․ Էդգար Ղազարյան

Հասարակական, քաղաքական գործիչ Էդգար Ղազարյանը ԱԺ-ում էր՝ հանդիպելու Տնտեսական հարցերի մշտական հանձնաժողովի անդամների հետ։ Թեման վարչապետին անվստահություն հայտնելու գործընթաց սկսելն էր։ Սակայն նրան հայտնեցին, որ հանձնաժողովի անդամ Սերգեյ Բագրատյանը նպատակահարմար չի գտնում ընդունել իրեն։

«Ինձ քաղաքական ուժերի օրակարգերը հետաքրքիր չեն, ինձ հետաքրքիր են ԱԺ պատգամավորների՝ իրենց պարտականություններից բխող գործողությունների կատարումը։ պատգամավորները պարտավոր են կատարել իրենց ֆունկցիաները՝ վերահսկեն կառավարության գործունեությունը, իսկ անհամապատասխանության դեպքում անվստահություն հայտնեն վարչապետին։ Վարչապետին անվստահություն ԱԺ-ն կարող է հայտնել ցանկացած պահի»,- լրագրողների հետ զրույցում ասել է Ղազարյանը։

Նա հայտնել է նաև, որ պատրաստվում է երկուշաբթի օրը երեք խմբակցություններին գրություն գրել՝ առաջարկելով, որ նրանք նաև անվստահության գործընթաց սկսեն ՀՀ նախագահ Վահագն Խաչատուրյանի նկատմամբ, «որովհետև նա էլ է զբաղեցնում նախագահի հետ անհամատեղելի պաշտոններ»։