Վիլյամ Սարոյան նկարիչը․ բացվել է գրողի նկարների ցուցահանդեսը

Սեպտեմբերի 5-ին Գրականության և արվեստի թանգարանում բացվել է «Սարոյանական գույներ. բառերից անդին» ժամանակավոր ցուցադրությունը, որով էլ մեկնարկել են Սարոյանական օրերը՝ Գրքի Երևանյան փառատոնի շրջանակում:
Ներկայացված են Սարոյանի 100-ից ավելի նկարչական աշխատանքները, որոնք Հայաստան են բերվել Ամերիկայից: Աշխատանքներում գերիշխում են ինքնադիմանկարներն ու աբստրակտ մոդեռնիզմը:
Ժամանակավոր ցուցադրության մեջ ներառվել է նաև Գրականության և արվեստի թանգարանին պատկանող ցուցանմուշներից մեկը՝ գրողի հեծանիվը: Սարոյանն այդ հեծանիվը նվեր է ստացել, երբ 1976 թվականին այցելել էր Հայաստան: Նա հեծանիվը վարել է Գյումրի-Երևան ճանապարհին, որից հետո այն նվիրել է Գրականության և արվեստի թանգարանին։ Հեծանվի հարևանությամբ ցուցադրվում է նաև Սարոյանի ամենանշանավոր լուսանկարներից մեկը, որի հեղինակը լուսանկարիչ Պողոս Պողոսյանն է: Լուսանկարում Սարոյանը հեծանիվը վարում է լեռնային ճանապարհին:
Ցուցադրությունն իրականացվում է ԱՄՆ-ի «Վիլյամ Սարոյան» հիմնադրամի հետ համագործակցությամբ։
Ցուցադրությունը կգործի մինչև 2026 թվականի հունվարի 30-ը։