«Իրենց երեխաներին ի՞նչ են պատմելու․ որ 25 տարվա վաղեմության շինությո՞ւն են քանդել»․ Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը. «Այստեղով անցել է Երևանի քաղաքապետարանը:
Երևանի քաղաքապետարանը «քանդող բրիգադ(ներ)» ունի: Դրանց կազմում են տրակտորներ, հնդիկներ, բեռնատարներ, հայ վարորդներ և «ղեկավարներ»: Նայեք նկարին: Շուրջ 25 տարի շարունակ այստեղ հացի փուռ էր, այնուհետև՝ արցախցիները ժենգյալով հաց էին թխում: Շինությունն ինքնակամ էր կառուցված՝ առանց թույլտվության: 25 տարի առաջ: Իրավաչափության տեսանկյունից, այդ շինությունը ենթակա էր ոչ թե քանդման, այլ օրինականացման: Գիտե՞ք ինչու: Որովհետև, 25 տարի շարունակ Հայաստանի Հանրապետությունը գիտեր այդ շինության տեղն ու դրանում իրականացվող գործունեության մասին: Ավելին՝ շինության ներսում կար ՀԴՄ սարք, հետևաբար՝ գործունեությունը հարկվում էր: Քանդեցին:
Լավ, մի կողմ թողնենք տրակտորը, հնդիկներին և բեռնատարը: Մնացին հայաստանցի վարորդներն ու «բրիգադի ղեկավարները»: Երեկոյան տանը նրանք իրենց երեխաներին ի՞նչ են պատմելու՝ որ 25 տարվա վաղեմության շինությո՞ւն են քանդել, որ մեկ այլ երեխայի հա՞ցն են «կտրել»: Ի դեպ, միգուցե դա էր պատճառը, որ տրակտոր վարողն ամեն կերպ փորձում էր երեսը թաքցնել:
Չմոռանամ: Երեկ այսպիսի մի «քանդող բրիգադ» հայտնվել էր Ալեք Մանուկյան փողոցում՝ ԵՊՀ-ի գլխավոր մասնաշենքի դիմաց: «Քանդող բրիգադը» զննեց տարածքը և հեռացավ: Կարո՞ղ է ԵՊՀ-ն էլ, որպես ինքնակամ կառույց, քանդեն: Անկեղծ՝ սրանցից հեռու չէ»։