«Արդյո՞ք Լևոն Տեր-Պետրոսյանի առաջարկը ՌԴ ջատագովության շարունակությունը չէ»․ Արսեն Թորոսյան

Աշխատանքի և սոցիալական հարցերի նախարար Արսեն Թորոսյանի ֆեյսբուքյան գրառումը․ «Առավոտյան մամուլը թերթելիս տեսա, որ երեկ ՀՀ առաջին նախագահ Լևոն Տեր-Պետրոսյանը կրկին «խնդիր լուծելու» առաջարկ է արել:
Նա առաջարկել է «Զանգեզուրի միջանցքի» անունը փոխել և դնել «Զանգեզուրի տրանսպորտային հանգույց»: Զավեշտալին այստեղ այն է, որ մենք արդեն տևական ժամանակ է մերժելով Ադրբեջանի կողմից անընդհատ օգտագործվող «Զանգեզուրի միջանցք» տերմինը, ինչպես նաև «միջանցքային» տրամաբանությունը, հանդես ենք եկել «Խաղաղության խաչմերուկ» նախաձեռնությամբ, որն ըստ էության ընկալվել է միջազգային հանրության կողմից, ավելին ԱՄՆ հետ երկկողմ հուշագիր է ստորագրվել, որով ԱՄՆ-ն աջակցություն է հայտնում այդ նախագծին: Ինչպես նաև ապաշրջափակման շրջանակներում մեր տարածքով անցնող կոմունիկացիաների մի հատվածի մասով, որտեղ ԱՄՆ-ն ներդրումներ կանի և միգուցե դրա կառավարման մեջ դերակատարում կունենա, ներմուծվել է նոր տերմին՝ TRIPP:
Սակայն Տեր-Պետրոսյանը, ինձ համար անհասկանալի պատճառներով, կրկին ջուր է լցնում մի տրամաբանության ջրաղացին, որը մերժվել է մեր կողմից, ինչ-որ նոր տերմիններ է հորինում, որոնք ոչ մի կերպ չեն բխում մեր շահերից: Ընդհանրապես չեմ հասկանում, թե ինչ կարիք կար անելու դա, երբ ամեն ինչ իր հունով գնում է:
Միայն մի համընկնում կարող եմ մատնանշել. նա այս առաջարկից մի քանի օր առաջ հանդիպել է ՌԴ դեսպանին և ինչպես բոլորս շատ լավ հիշում ենք Ռուսաստանն է եղել «Զանգեզուրի միջանցքի» և «Միջանցքային տրամաբանության» ամենամեծ ջատագովներից մեկը:
Արդյո՞ք նրա այս առաջարկը այդ ջատագովության շարունակությունը չէ»։