«Մի նեղացիր, որ հանրությունը ձեր անձերի նկատմամբ հիասթափություն է արտահայտում»․ Վահագն Ավագյան

Ազգային-Ժողովրդավարական Բևեռի խորհրդի խոսնակ Վահագն Ավագյանի ֆեյսբուքյան գրառումը․ «Բարև Մկրտիչ Արզումանյան ջան։ Աստված պահապան եղբայրս։
Խնդրում եմ 10, 20, կամ 30 տարի հետո չկանգնես, ասես՝ չես իմացել, որ Նիկոլ Փաշինյանն ու Վահագն Ալեքսանյանը կոլաբորացիոն կառավարություն են եղել, հայ ժողովրդին չեն ներկայացրել։
Եթե Հայաստանյայց Առաքելական սուրբ եկեղեցու վրա հարձակումներն ու Քրիստոսի հիմնած եկեղեցու կառավարումը փոխելու մտադրությունը, հայկական էթնոսի ձևավորման ամենակարևոր խորհրդանիշերի դեմ հարձակումները, Հայոց ցեղասպանության ուրացումը, Հայաստանի առաջին Հանրապետության դեմ ռազմական ագրեսիայի հետևանքների լեգիտիմացումը, Հայաստանի երրորդ Հանրապետության դեմ ռազմական ագրեսիայի լեգիտիմացումը, Արցախի հայաթափման լեգիտիմացումը, թշնամի ուժերի հետ ակնհայտ կոլաբորացիան ծանրակշիռ պատճառ չեն քո և քո գործընկերների համար՝ համապատասխան վերաբերմունք ցույց տալու (դուք կարող էիք ընտրել թե ինչպես, պարտադիր չէ հարձակվեիք վրան, ծեծեիք), ապա հոգաչափ խնդրում եմ՝ մի նեղացիր մեր հանրության այն հատվածից, ով ձեր անձերի նկատմամբ հիասթափություն է արտահայտում։
Բազմաթիվ մարդիկ, իրենց արժանապատիվ դիրքում մնալով, զրկվելով ֆինանսական միջոցներից և հալածանքների ներքո, շարունակում են ապրել ու ստեղծագործել Հայաստանում, էնպես որ ձեզնից անհնարինը չենք պահանջում։
Գիտեմ, որ ստեղծագործողներին ուղղորդելը տգեղ և անգամ վիրավորական բան կարող է լինել, նախօրոք ներողություն եմ խնդրում համարձակությանս համար։
Մի օր էլ Սասնա Ծռերից ներկայացում արեք խնդրում եմ։ Թող, օրինակ՝ հենց Դավթի ճյուղը լինի ու էս մեջբերմամբ սկսվի ներկայացումը՝ «Մըսրա Մելիք Սասուն դարձրեց իրեն հպատակ ու հարկատու, Ցռան Վերգոյին կարգեց Սասնա կառավարիչ»»։