«Հնարավոր չէ Նիկոլի նման ղեկավարից դրական «սպասում» ունենալ»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Մաթեմատիկայում «սպասում» հասկացությունը (մաթեմատիկական սպասում) հստակ և գիտական նշանակություն ունի: Այն ցույց է տալիս, թե եթե միևնույն փորձը կրկնվի բազմիցս, միջինում ի՞նչ արդյունք է ստացվելու: Սա հավասարակշռված ու կանխատեսելի մոտեցում է, որը հաշվարկվում է իրական տվյալների և հավանականությունների հիման վրա: Եթե անցյալի արդյունքները հիմնականում բացասական են, ապա միջին արժեքը՝ մաթեմատիկական սպասումը, նույնպես բացասական է լինելու: Այստեղ չկան կախարդական շրջադարձեր կամ ինքնախաբեություն, ամեն ինչ շատ հստակ է:
Այս մաթեմատիկական եզրույթը կարելի է պրոյեկտել նաև քաղաքական իրականության վրա: Օրինակ՝ դիտարկելով վերջին տարիների իրադարձությունները, կարելի է հասկանալ, թե ինչ «սպասում» կարելի է ունենալ գործող իշխանությունից:
Նիկոլ Փաշինյանը հայտարարում է, թե խաղաղություն է բերել, մինչդեռ նրա կառավարման տարիներին հասարակությունը ականատես է եղել կորուստների՝ տարածքների, մարդկային կյանքերի և արժանապատվության: Եթե այս արդյունքները դիտարկենք մաթեմատիկական տրամաբանությամբ, դրանցից ստացվող «միջին արժեքը» ակնհայտորեն բացասական է և վկայում է շարունակական բացասական միտումների մասին:
Չնայած այս ամենին՝ Փաշինյանը շարունակում է իր պատկերացումները ներկայացնել որպես դրական հավանականություն: Նա փորձում է համոզել, որ կորուստների շարքը կարող է միջինում բերել լավ արդյունք, ասել է թե, «խաղաղություն»: Սա նման է մաթեմատիկական այն խնդրին, որտեղ միևնույն բացասական թվերը բազմիցս գումարելով՝ միջինում ստանում ենք դրական արդյունք: Տրամաբանության խախտումը ակնհայտ է։
Կարճ ասած, հնարավոր չէ ունենալ Նիկոլի նման ղեկավար, ումից «սպասումը» լինի դրական»: