«Ջուխտակ վանքի մոտ շնչելն անհնար է, գարշահոտը խեղդում է»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Դիլիջան քաղաքից 3 կմ հյուսիս-արևմուտք՝ ճանապարհի աջ կողմում, անտառապատ բլրի լանջին հառնում է Ջուխտակ վանական համալիրը։ Այն բաղկացած է երկու առանձին եկեղեցիներից՝ Սուրբ Աստվածածին և Սուրբ Գրիգոր, ինչպես նաև վերջինների շուրջ տարածված գերեզմանոցից։
Եկեղեցիների պատերին կան արձանագրություններ, որոնցում հիշատակվում են նաև Պետրոսի վանք և Գիշերավանք անվանումները։ Սուրբ Աստվածածին եկեղեցին կառուցվել է 1201 թվականին։ Պատմական, հոգևոր նշանավոր այդ կթողոները պահպանվում են պետության կողմից, սակայն․․․ «Քո Դիլիջան»-ը ֆեյսբուքյան էջում «Անահիտ արտ» օգտատերը գրել է․ «Հարգելի դիլիջանցիներ։ Եթե նկատել եք, Ջուխտակ վանքերին կից տարածքում կենդանիներ են պահում։ Նախկինում դրանք քիչ էին ու այդքան սուր գարշահոտ չէր փչում, այժմ այնտեղ գտնվելը խիստ տհաճ է՝ գոմաղբի ծանր հոտի պատճառով։ Ո՞վ պիտի հետևի ճարտարապետական հուշակոթողի շուրջ մաքրություն և անտառի թարմ օդը պաշտպանելու հարցը կարգավորելուն։ Ի վերջո, այնտեղ զբոսաշրջիկներ շատ են այցելում և անհարմար է նաև այդ առումով։ Գուցե արժե կենդանիներ պահող մարդկանց առաջարկել իրենց կենդանիներին հեռացնել այլ վայր և տարածքը մաքրել նման փնթիությունից, գոմերն ու իրենց կացարանը դեմոնտաժ անեն, տեղափոխեն այլ վայր։
Ինձ հուզում է այս հարցը, իսկ ձե՞զ։
Հ.Գ. Շների մասին էլ ասել ավելորդ չէ, որոնք արդեն մի քանիսն են (առաջ մեկն էր) ու ազատ արձակած, որոնք քիչ է մնում հոշոտեն՝ թե փորձես մոտենալ աղբյուրին»։
Դիլիջանցիներն ասում են, որ Ջուխտակ եկեղեցիների մոտ շնչելն անհնար է, գոմաղբից տարածվող գարշահոտը խեղդում է»։