«Հոսանքն անջատվում է նույնիսկ մի փոքր քամուց»․ Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը. «Պատշաճ էլեկտրամատակարարում ունենալը՝ քաղաքացիների հիմնարար իրավունք է։
Մի փոքր քամի, մի քանի ամպ, ու հոսանքը անջատվում է։ Սա արդեն սովորական երևույթ է դարձել շատ բնակավայրերում։ Բայց իրականում սա անթույլատրելի է։
Երբ ասում ենք՝ պետք է արդիականացնել էլեկտրացանցերը և փոխարինել մաշված էլեկտրահաղորդման գծերը, հենց այսպիսի դեպքերն ենք նկատի ունենում։ Տարիների ընթացքում չթարմացված, անպաշտպան և մաշված համակարգը չի դիմանում նույնիսկ փոքր եղանակային փոփոխություններին։
Արդյունքում՝ քաղաքացիները մնում են առանց լույսի, վտանգվում է մարդկանց առողջությունն ու անվտանգությունը․
․ Հիվանդներին անհրաժեշտ բժշկական սարքեր կարող են դադարել աշխատել։
․ Սառնարաններում պահպանվող սնունդը կարող է փչանալ։
․ Երեխաները մնում են առանց սովորելու և հանգստի բնական պայմանների։
․ Բիզնեսները կրում են վնասներ։
Սա ոչ թե պարզապես տեխնիկական անսարքություն է, այլ հասարակական անվտանգության և իրավունքի խախտում։

Քաղաքացիները պարտավոր չեն ամեն անգամ եղանակի պատճառով լույսի բացակայության ենթարկվել։ Պետությունն ու սպասարկող ընկերությունները պետք է պատասխանատվությամբ մոտենան այս խնդրին և ապահովեն ժամանակակից, անվտանգ ու անխափան էլեկտրամատակարարում»։