«Փաշինյանը և իր թիմը ծանր պատասխանատվությունից փախչելու համար դիմելու են կեղծիքների»․ Տիգրան Աբրահամյան

«Այս ողջ ընթացքն ուղեկցվել է Արցախի և Հայաստանի նկատմամբ նոր հարձակումներով՝ քարոզչական, քաղաքական, դիվանագիտական նաև ռազմական։ Վստահ եմ՝ Նիկոլ Փաշինյանը և իր թիմը գիտակցում են այն ամենը, ինչ իրականացրել են, և այդ ծանր պատասխանատվությունից փախչելու համար դիմելու են կեղծիքների։ Այս իշխանությունը միայն կարողանում է հորինել իրականություն, կեղծել պատմությունը և փորձել սրբագրել իրենց այն քաղաքական մոտեցումները, որոնք հայ ժողովրդի համար բազում ողբերգական էջեր են բացել»,- այս մասին Եռաբլուրում լրագրողների հետ զրույցում նշեց «Պատիվ ունեմ» խմբակցության պատգամավոր Տիգրան Աբրահամյանը, ով եկել էր աջակցելու զոհված զինծառայողների ծնողներին։

Պատգամավորի դիտարկմամբ՝ ստեղծված իրավիճակը մի օր պայթելու է, և այս իշխանությունը փլուզվելու է։

Անդրադառնալով Չորրորդ հանրապետության վերաբերյալ հայտարարությանը՝ Աբրահամյանը նշեց․ «Փաշինյանը փորձում է թաղել Երրորդ հանրապետությունը՝ նկատի ունենալով այն հանգամանքը, որ իր կառավարման ընթացքում իր քաղաքականության բերած սպառնալիքները թաղել են այն ամենը, ինչ եղել է Երրորդ Հանրապետության սկզբունքներում»։

Նշենք, որ Անկախության տոնին ընդառաջ զոհված զինծառայողների ծնողները հավաքվել են Եռաբլուրում, որ թույլ չտան վարչապետ Նիկոլին Փաշինյանն ու այլ ՔՊ-ականներ այցելեն պանթեոն։