«Չպետք է բացառել, որ պայքար կսկսեն նաև Սեպտեմբերի 21-ի դեմ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Այսօր Հայաստանի Անկախության օրն է:
ՀՀ-ում, ավելի հստակ՝ Հայաստանի Առաջին Հանրապետության գոյության 1000 օրերին, Անկախության օրը նշվում էր Մայիսի 28-ին: Տոնը պետականորեն նշվել է միայն երկու անգամ՝ 1919 և 1920 թվերին, քանի որ արդեն 1921-ին, թեև նոմինալ անկախ, բայց Հայաստանը բոլշևիկացվել էր: Մայիսի 28-ը այն օրն է, երբ Թիֆլիսի Հայոց Ազգային խորհուրդը ստիպված ընդունեց օսմանյան վերջնագիրը և պատվիրակություն ուղարկեց Բաթում՝ թուրքերի հետ շարունակելու բանակացությունները:
Խորհրդային յոթ տասնամյակներին որպես անկախության օր, թեև ճիշտ չէ այդ բառը օգտագործել, քանի որ Խորհրդային Հայաստանը ԽՍՀՄ մաս էր կազմում և անկախ չէր, նշվել է նոյեմբերի 29-ը: Նշվել է որպես խորհրդայնացման օր: Այդ օրն էր, որ Բաքվում ձևավորված Հայհեղկոմը Իջևանի հատվածով ներխուժեց Հայաստան՝ ունենալով ռուս բոլշևիկների օժանդակությունը:
1991 թվականի այս օրը Հայաստանի ժողովուրդը, բայց ոչ Արցախը, քանի որ Արցախը չմասնակցեց այդ քվեարկությանը, ընդունեց հանրապետության անկախությունը ԽՍՀՄ-ից դուրս: Այդ ժամանակից մեր պետության գլխավոր տոնը դարձավ սեպտեմբերի 21-ը:
Այսօրվա իշխող ուժը՝ ՔՊ-ն, որպես ռազմավարական նպատակ հռչակել է Չորրորդ Հանրապետությունը:
Քանի որ վարչապետ Փաշինյանն ու պարոպագանդան պայքար են սկսել նախկինի դեմ և ձեռնամուխ եղել ՀԻՇՈՂՈՒԹՅԱՆ ՆՈՐ ՔԱՂԱՔԱԿԱՆՈՒԹՅԱՆ ձևավորմանը, չպետք է բացառել, որ նրանք պայքար սկսեն Սեպտեմբերի 21-ի դեմ՝ որպես Երրորդ Հանրապետության գլխավոր խորհրդանիշ:
Ամբողջ խնդիրն այն է, որ Սեպտեմբերի 21-ի Անկախության հանրաքվեն անցել է ճիշտ այն սահմաններում, որը սիրում է գրպանից հանել ու ոսկեգույնով ցուցադրել պարոն Փաշինյանը, այն է՝ 29.743:
Շնորհավոր Սեպտեմբերի 21»։