Հայտնի են 2025թ․ «Ավրորա» մրցանակի հավակնորդները

«Ավրորա» մարդասիրական նախաձեռնությունը հայտարարել է 2025թ․ «Ավրորայի» չորս հերոսների անունները, որոնք հավակնում են «Ավրորա» համաշխարհային մարդասիրական մրցանակի1 միլիոն դոլար պարգևին։ Սալի Բեքերին (Միացյալ Թագավորություն), Ջամալ Էլթայեբին (Սուդան), Զուհայր Լահնային (Մարոկկո) և Ջիլ Սիմանին (ԱՄՆ/Հարավային Սուդան) «Ավրորա» մրցանակի Ընտրող հանձնաժողովն ընտրել է ավելի քան 800 թեկնածուներից։ Այս չորս հերոսներից մեկը կդառնա այս տարվա «Ավրորա» մրցանակի դափնեկիր։ Նրա անունը կհայտարարվի նոյեմբերի 6-ին Նյու Յորքում կայանալիք մրցանակի շնորհման արարողության ժամանակ։

2025թ․ «Ավրորայի» հերոսներն են․

Սալի Բեքեր (ՄԹ)՝ մարդասիրական գործիչ, որը Բոսնիայի և Կոսովոյի հակամարտությունների ժամանակ հարյուրավոր երեխաների է դուրս բերել պաշարված տարածքներից և հիմնել մանուկներին շտապ բուժօգնություն ցուցաբերող կազմակերպություններ: Տիկին Բեքերը հետագայում ընդլայնել է իր գործունեությունը դեպի Իրաք, Ուկրաինա և Գազա՝ սկսելով հեռաբժշկության ծրագիր, որը տեղացի բժիշկներին կապում է մանկաբույժների համաշխարհային ցանցի հետ։
Ջամալ Էլթայեբ (Սուդան)՝ բժիշկ, որի ջանքերով 2023թ․ ապրիլից՝ պատերազմի սրումից ի վեր, Օմդուրմանի «Ալ Նաո» հիվանդանոցը շարունակում է գործել մեծ Խարթումի՝ որպես վերջին բուժկենտրոններից մեկը։ Բժիշկ Էլթայեբի ղեկավարությամբ հիվանդանոցը շարունակում է իր գործունեությունը և, չնայած անընդհատ տեղացող ռմբակոծություններին, ռեսուրսների ծայրահեղ պակասին ու ենթակառուցվածքների փլուզմանը, օգնում փրկել հարյուրավոր կյանքեր:
Զուհայր Լահնա (Մարոկկո)՝ մանկաբարձ-գինեկոլոգ, որն ավելի քան երկու տասնամյակ աշխատում է հակամարտության և աղետներից տուժած գոտիներում՝ տրամադրելով բժշկական խնամք, վերապատրաստելով տեղի անձնակազմին և համակարգելով մարդասիրական օգնությունը: Բժիշկ Լահնան աշխատել է Աֆղանստանում, Կոնգոյի Դեմոկրատական ​​Հանրապետությունում, Սիրիայում, Եմենում, Լիբիայում, Ուգանդայում, իսկ վերջերս՝ նաեւ Գազայում, որտեղ 2023թ․ հոկտեմբերից սկսած պարբերաբար հերթափոխով բժշկական ծառայություն է իրականացնում։
Ջիլ Սիման (ԱՄՆ/Հարավային Սուդան)՝ բժիշկ, որը համահիմնադրել է «Հարավային Սուդանի բժշկական օգնություն» կազմակերպությունը և ավելի քան երեք տասնամյակ շարունակում է կենսական բուժօգնություն տրամադրել հակամարտությունից տուժած Հին Ֆանգակում՝ տարեկան բուժելով մոտ 40․000 հիվանդի: Բժիշկ Սիմանը համարվում է վիսցերալ լեյշմանիոզի և տուբերկուլյոզի կանխարգելման պրոտոկոլների ներդրման առաջամարտիկ Հարավային Սուդանում և Ալյասկայի գյուղական համայնքներում՝ վերապատրաստելով տեղի բուժաշխատողներին և գործնականում օգնելով նրանց։