Մահացել է Կլաուդիա Կարդինալեն

87 տարեկանում մահացել է իտալացի դերասանուհի Կլաուդիա Կարդինալեն: ANSA-ն հայտնում է, որ դերասանուհին մահացել է Ֆրանսիայում գտնվող Նեմուր քաղաքի իր տանը, որտեղ ապրում էր վերջին տարիներին։ Մահվան պատճառը դեռևս հայտնի չէ։

Կարդինալեն հանդես է եկել 60-ականների և 70-ականների եվրոպական մի շարք նշանավոր ֆիլմերում։
Հայ հանդիսատեսը Կլաուդիա Կարդինալեին ճանաչում է 1991 թվականին ռեժիսոր Անրի Վերնոյի նկարահանած կենսագրական «Մայրիկ» ֆիլմով, որտեղ դերասանուհին հանդես է եկել Հայոց ցեղասպանության ժամանակ Մարսել տեղափոխված հայ ընտանիքի մոր կերպարում:
«Դերում ես վերապրեցի հայ մայրիկի մեծ և դժվարին ճակատագիրը՝ 20-ամյա երիտասարդ կնոջից, մինչև ճերմակահեր 80-ամյա ծեր կնոջ։ Բազում դժվարությունների ապրած կնոջ մի ամբողջ կյանք։ Օգնեց նաև այն, որ շատ էի լսել Հայաստանի և հայ ժողովրդի մասին։ Հուսով եմ՝ այս ֆիլմով ես կգամ մի օր դեպի Արարատ»,- ասել է դերասանուհին՝ «Մայրիկ» ֆիլմում իր դերի մասին: