«Սպանություն կատարած անձը դեռ չի հայտնաբերվել»․ Արտակ Հովհաննիսյան

«Նախաձեռնվել է քրեական վարույթ ՀՀ ՔՕ 155-րդ հոդվածով նախատեսված հանցագործության հատկանիշներով՝ Վալոդյա Գրիգորյանի և Կարեն Աբրահամյանի մահվան փաստի առթիվ, իսկ Արծրուն Գալստյանի նկատմամբ սպանության փորձի հատկանիշներով նախաձեռնվել է 44-155-րդ հոդվածի հատկանիշներով քրեական վարույթ»,- լրագրողներին հայտնեց Քննչական կոմիտեի հատկապես կարևոր գործերի քննության գլխավոր վարչության քննիչ Արտակ Հովհաննիսյանը:
«Սպանությունները կատարած անձը դեռ չի հայտնաբերվել, այդ ուղղությամբ կատարվում են հնարավոր բոլոր քննչական ու ապացուցողական գործողությունները»,- հայտնեց Հովհաննիսյանը՝ հավելելով, որ դեպքի վայրից տեսանկարահանող սարքերի տեսաձայնագրությունները ևս առգրավվել են, նշանակվել են փորձաքննություններ, այդ թվում՝ դատաբժշկական, հարցաքննվել են մի շարք վկաներ։ Նրա խոսքով հայտնաբերվել է 18 կրակված պարկուճ, տեսանկարահանող սարքերի միջոցով է հնարավոր եղել պարզել, որ սպանություն կատարած անձը եղել է դիմակավորված, ով ինքնաձիգից կրակահերթ է արձակել, որի հետևանքով Վալոդյա Գրիգորյանն ու Կարեն Աբրահամյանը տեղում մահացել են։
Նա նաև հայտնեց, որ բոլոր վարկածներն ուսումնասիրվում են, այդ թվում՝ ամիսներ առաջ Մերձավանում տեղի ունեցած սպանության հետ կապված վարկածը։