«Վենդետան և զենքով հարց լուծելը դարձել են առօրյա»․ Դավիթ Սանասարյան

«Ինքնիշխան Հայաստան» կուսակցության նախագահ Դավիթ Սանասարյանի ֆեյսբուքյան գրառումը․ «Փարաքարի համայնքապետ Վոլոդյա Գրիգորյանի և ընկերոջ սպանությունը ոչ միայն ողբերգություն է, այլև վկայություն՝ մեր հասարակության վտանգավոր հիվանդության մասին։
Ցավակցությունը քիչ է, այս կերպ առաջ շարժվելն ինքնանպատակ է, եթե չտեսնենք հիմնականը․
վենդետան և զենքով հարց լուծելը դարձել են առօրյա, և մենք՝ որպես հասարակություն, արդեն սովորել ենք հանդուրժել դա։ Մնում ենք ֆեյսբուքում ողբացող ու դատապարտող, բայց իրական կյանքում՝ լուռ համաձայնող։
Այսօր հանցավորությունը այլ որակ ունի․ վերջին շրջանում երիտասարդները առանց երկար մտածելու հարցերը լուծում են դանակով, հրազով ու այլ վտանգավոր եղանակներով, որոնց գոյությունը տարիներ առաջ, իմ վաղ երիտասարդության շրջանում նույնիսկ չէր էլ քննարկվում։ Կռիվ ու անախորժություն միշտ է եղել, ցավը նրանում է, որ այսօր ամենաթեթև հարցերն ավարտվում են արյունահեղությամբ։
Պետք է արձանագրել՝ իրավապահ համակարգը ձախողել է։ Նույնիսկ այս սպանության բացահայտումը չի կարող լուծել համակարգային ճգնաժամը։ Հարցը ոչ թե միայն հանցագործին գտնելն է, այլ հանցագործությունները կանխելն ու մթնոլորտը փոխելը։
Մեզ պետք է ոչ թե պատահական արդարացում կամ հերթական «վայ բացահայտում», այլ ներազգային խաղաղություն։ Եթե ներսում խաղաղություն չստեղծենք՝ ոչ մի արտաքին անվտանգություն չի լինելու։ Մնացածը՝ քաղաքական, տնտեսական կամ սոցիալական խնդիրներն ածանցյալ են այս կարևոր բացի։
Հ.Գ. Սպանվողները հայ են, ցավն ու կսկիծը մեծ է, բայց փորձեք ձերծ մնալ նման վիճակում օգտվելու քաղաքականությունից։
Եվ ամենացավալին․ այս լույս ընտանիքը որբացավ (սպանված մյուս հայրենակցի ընտանիքի մասին ոչինչ հայտնի չի)»։