«Ոմանց կարելի է մեղադրել, բայց նրանք երբեք չեն կարող դատվել խղճով»․ Էրիկ Բեգլարյան

Արցախի փաստաբանների պալատի նախագահ Էրիկ Բեգլարյանի ֆեյսբուքյան գրառումը. «Ես իմ 20 տարվա փաստաբանական գործունեության ընթացքում լսել եմ մեղադրյալի աթոռին նստած անձանց բազմաթիվ վերջին խոսքեր։
Ես տեսել եմ տարբեր մարդիկ՝ տարբեր ճակատագրերով, ովքեր փորձել են արդարացնել իրենց քայլերը, բացատրել իրենց գործողությունները կամ պարզապես պատմել իրենց ցավը դատարանի դահլիճում։ Ես տեսել եմ դատախազներ, որոնք խղճահարություն չունեցող համոզմունքով են փորձել պաշտպանել իրենց վարկածը, և հաճախ՝ ոչ թե արդարության, այլ պետական պատվերի համար։ Նրանք ջանք ու եռանդ չեն խնայել սուտը ճշմարտության տեսքով ներկայացնելու, դատարանին մոլորեցնելու համար։
Ցավոք, ես նաև տեսել եմ դատավորներ, ովքեր արդար դատաստանի փոխարեն ընտրել են հլու հնազանդորեն կատարել վերևից իջեցված հրահանգները։ Նրանք թողել են ճշմարտությունը, արհամարհել օրենքի ոգին ու բառացիորեն գործել որպես պետական մեքենայի գործիք։
Բայց մի բան, որը երբեք չեմ մոռանա՝ դա Միքայել Արքեպիսկոպոս Աջապահյանի խոսքն էր դատական նիստում։
Այդ օրը նա չխոսեց որպես մեղադրյալ, այլ՝ որպես մարդ, որպես հոգևորական, ով ոչ թե պաշտպանվում էր, այլ բարձրաձայնում էր ճշմարտությունը՝ համարձակ, արժանապատվորեն ու սրտացավ։ Նրա խոսքը դուրս էր իրավական սահմաններից։ Դա խոսք էր՝ Աստծո ու ժողովրդի առաջ ազնիվ և անսասան հավատով։
Դա խոսք էր, որ խոցում էր, արթնացնում, մտորելու մղում։ Դատական դահլիճը լռել էր՝ ոչ թե իրավական կարգապահության պատճառով, այլ՝ խոսքի ուժից, որ հնչեց այնտեղ։ Այդ պահին շատերը հասկացան՝ ոմանց կարելի է մեղադրել օրենքով, բայց նրանք երբեք չեն կարող դատվել խղճով։
Ուզում եմ միայն մի բան ասել՝
Աստված Ձեզ հետ սիրելի Սրբազան։
Ձեր ճշմարտությունն ավելի հզոր է, քան նրանց վճիռները»: