«Լիակատար քաոս»․ Մոլդովայի նախկին նախագահն՝ ընտրությունների մասին

«Լիակատար քաոս». այսպես է Մոլդովայի նախկին նախագահ Իգոր Դոդոնը բնութագրել երկրի խորհրդարանական ընտրությունների կազմակերպումը «Իզվեստիա»-ին տված հարցազրույցում։

Նա նշել է, որ ԵՄ երկրների մեծ մասում ընտրատեղամասերը համալրված են մոլդովացի դիտորդներով, սակայն արդեն գրանցվել են քվեաթերթիկների լցոնման դեպքեր, որոնք ընդդիմության ներկայացուցիչները վիճարկում են Կենտրոնական ընտրական հանձնաժողովում։

«Ինչ վերաբերում է Մերձդնեստրին, ապա այնտեղ լիակատար քաոս է։ Հինգ կամուրջ է փակվել։ Ավելին, ինչպես գիտեք, քվեաթերթիկների քանակը զգալիորեն կրճատվել է։ Մերձդնեստրում բնակվող մեր 275,000 քաղաքացիների համար ոչ ավելի, քան 24,000 քվեաթերթիկ։ Սա քաոս է», - հավելել է Դոդոնը։

Այնուամենայնիվ, նախկին նախագահը հույս է հայտնել առաջիկա խորհրդարանական ընտրություններում ընդդիմության հաղթանակի վերաբերյալ։