«Ոստիկանությունն այցելել է Սյուզի Բադոյանի տուն՝ եթերում արված հայտարարության համար»․ Նարեկ Սամսոնյան

«Իմնեմնիմի» փոդքաստի համահեղինակ Նարեկ Սամսոնյանն ուղիղ եթերում հայտնել է, որ առավոտյան ոստիկանությունն այցելել է լրագրող Սյուզի Բադոյանի տուն՝ փոդքաստի եթերում արված հայտարարության համար․ «Սյուզի Բադոյանը եթերում ասել էր, որ, իր տեղեկություններով, դպրոցներից մեկում միջին դասարանցիներին նարկոտիկ են հյուրասիրել։ Մեր հերոս ոստիկանները, վստահաբար տիկին նախարարի իմացությամբ, չորս բոլորը սպանությունների պարագայում, գնում են և Սյուզիին ասում՝ պետք է գաս, հաղորդում տաս հանցագործության մասին։ Նախ՝ Սյուզին չի պնդել, որ դա 100% ճշմարտություն է, բայց այս ամենը գիտե՞ք՝ ինչ նպատակով է արվում, որպեսզի նա հայտարարություն տա, հետո ասեն, որ հայտարարությունը զրպարտություն է և քրեական գործ սարքեն»,- ասաց Սամսոնյանը՝ նշելով, որ այս ամենի նպատակն ընդդիմադիրներին լռեցնելն է։