«Միայն դատավճիռը չկարդաց՝ պահպանելով անմեղության կանխավարկածի վերջին մնացորդները». Արեգ Սավգուլյան

Աշխատանքի և սոցիալական հարցերի նախարարի նախկին խորհրդական Արեգ Սավգուլյանը ֆեյսբուքյան իր էջում գրել է. «#Չբացահայտում ՔԿ նախագահ Արթուր Պողոսյանը գտնում է, որ Վալոդյա Գրիգորյանի սպանությունը բացահայտված է։ Նա ներկայացրեց պաշտոնական վարկածը, ավելին, միայն դատավճիռը չկարդաց՝ պահպանելով անմեղության կանխավարկածի վերջին մնացորդները։
1. Քննչականի պետը մոռանում է, որ բոլոր ցուցմունքները կարող են փոխվել ցանկացած պահին, օրինակ՝ հաջորդ հարցաքննությանը կամ ավելի ուշ։ (Մեղադրյալը դատարանում կարող է հայտարարել, որ դրանք կորզվել են ճնշում գործադրելու արդյունքում):
2. Մութ մնաց գլխավոր մեղադրյալ Գևորգ Հարությունյանի կողմից Վալոդյային սպանելու իրական շարժառիթը։ Իսկ փետրվարի 5-ին սպանված Գրիգոր Օհանյանի եղբայր Նարեկ Օհանյանն առհասարակ չի ընդունել ներկայացված մեղադրանքները։
3. Ըստ պաշտոնական վարկածի՝ Գ.Հարությունյանը ընկերոջ վրեժն է լուծել, դաշտում կրակել է, նախապատրաստվել է 6 ամիս։ Եվ դա չեն նկատել փաստացի տարածքում օպերատիվ-համալիր ծառայություն իրականացնող արհեստավարժ իրավապահները։
4. Արդյունքում Գ.Հարությունյանը հանուն ընկերոջ վրեժի սպանել է ոչ թե սպանության մեջ մեղադրվողին, այլ նրա եղբորը՝ Վալոդյային, վերջինիս ընկերոջը և մեկ հոգու էլ ծանր վիրավորել։
Հ.Գ. Դո՛ւք այսօր պաշտոնական վարկած շրջանառեցիք, որ սպանությունը եղել է վրեժխնդրության հիմքով և սլաքները ուղղեցիք դեպի կորուստ ունեցող ընտանիքներ և մերձավոր բարեկամներ։ Ինչպե՞ս եք կանխելու նոր, ո՛չ ցանկալի ողբերգությունները, մտածե՞լ եք։ Իսկ եթե դատավարության ժամանակ պատկերը փոխվի և նոր հանգամանքեր ի հայտ գան և արդեն ուշ լինի»։