«Դրամական աջակցության դիմումները մերժել են, իրենք՝ ճոխ ինքնապարգևատրվել»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Աղքատների դրամական աջակցության դիմումները մերժել են, իրենք՝ պետբյուջեից ճոխ պարգևատրվել:
Տավուշի մարզպետարանից տեղեկացել եմ, որ սեպտեմբերի 16-ի դրությամբ մարզպետի աշխատակազմի աշխատակիցներին վճարվել է 48 միլիոն 509.1 հազար դրամ պարգևավճար, ըստ իրենց դիմումների՝ մարզի կարիքավոր բնակիչներին տրվել է 39 միլիոն 541.0 հազար դրամի ֆինանսական աջակցություն։ Տավուշ մարզպետ Հայկ Ղալումյանը և մարզպետի աշխատակազմի շուրջ յոթ տասնյակ պաշտոնյաները պետական բյուջեից մոտ 9 միլիոն դրամ պարգևավճար ավելին են ստացել, քան ողջ Տավուշի մարզի սոցիալապես անապահովները՝ դրամական օգնություն։ Տավուշի մարզի բազմաթիվ կարիքավորներից բողոքներ եմ ստացել, որ Տավուշի մարզպետարանի համապատասխան հանձնաժողովը տարբեր պատճառաբանություններով մերժել է դրամական աջակցություն տրամադրելու իրենց խնդրանք-դիմումները։ Ստացվում է, որ մարզի աղքատների դրամական օգնության խնդրանք-դիմումները մերժել են, իսկ իրենք՝ պետբյուջեից ճոխ ինքնապարգևատրվել։ Սա «Նիկոլի թվին» սոցիալական անարդարություն է»։