ԱՄՆ-ն արգելափակել է իրանական բանակի միջազգային մատակարարման շղթան

ԱՄՆ-ի ֆինանսների նախարարությունը պատժամիջոցներ է կիրառել իրանական ռազմարդյունաբերական համալիրի միջազգային մատակարարման շղթաներում ներգրավված 21 ընկերությունների և 17 անձանց նկատմամբ, հայտարարել է գերատեսչությունը։
Տեղեկատվության համաձայն՝ սահմանափակումները վերաբերել են Իրանի, Չինաստանի, Հոնկոնգի, Գերմանիայի, Թուրքիայի, Պորտուգալիայի և Ուրուգվայի կազմակերպություններին և միջնորդներին, որոնք զբաղվում են բալիստիկ հրթիռների, հակաօդային պաշտպանության համակարգերի, ուղղաթիռների և ռազմական ինքնաթիռների արտադրության համար տեխնոլոգիաների և սարքավորումների մատակարարմամբ։

Վաշինգթոնը շեշտում է, որ այս ցանցերի գործունեությունը «նպաստում է Իրանի ռազմական կարողությունների զարգացմանը և սպառնալիք է ներկայացնում ԱՄՆ-ի զինվորական անձնակազմի, նավերի և քաղաքացիական անձանց համար»։ Պատժամիջոցների ցանկում ընդգրկված ընկերությունների և անհատների բոլոր ակտիվները ենթակա են արգելափակման ԱՄՆ-ում, և նրանց հետ ցանկացած գործարք արգելված է։

Այս սահմանափակումների խախտումը կարող է հանգեցնել քաղաքացիական կամ քրեական պատասխանատվության, այդ թվում՝ օտարերկրյա ֆինանսական հաստատությունների նկատմամբ երկրորդական պատժամիջոցների կիրառմանը, նշել է ԱՄՆ ֆինանսների նախարարությունը։