«Թրամփի հետ Ալյասկայում խոսել ենք միայն մեկ թեմայի շուրջ». Պուտին

Ուկրաինայի հակամարտության լուծումն Ալյասկայում ԱՄՆ նախագահ Դոնալդ Թրամփի հետ հանդիպման միակ թեման էր, հայտարարել է Ռուսաստանի նախագահ Վլադիմիր Պուտինը «Վալդայ» ակումբի նիստում:

«Այնտեղ նախագահ Թրամփի հետ մենք գործնականում ոչինչ չենք քննարկել, նույնիսկ երկկողմ հարցեր: Մենք միայն քննարկել ենք ուկրաինական ճգնաժամի լուծման հնարավորություններն ու մեթոդները: Ընդհանուր առմամբ, դա արդեն լավ է»,- ասել է Ռուսաստանի առաջնորդը:

Նա շնորհակալություն է հայտնել Թրամփին Ալյասկայի գագաթնաժողովը կազմակերպելու համար և հանդիպումն անվանել է Մոսկվայի և Վաշինգթոնի միջև հարաբերությունների վերականգնման ազդանշան:

Օգոստոսի 15-ին Ռուսաստանի և Միացյալ Նահանգների նախագահները յոթ տարվա ընթացքում առաջին անգամ լիարժեք հանդիպում անցկացրին: Գագաթնաժողովը տեղի է ունեցել Ալյասկայի Անքորիջ քաղաքում և ավարտվել է նրանով, որ առաջնորդները հայտարարել են «նշանակալի առաջընթացի» մասին, բայց առանց որևէ խաղաղության համաձայնագիր ստորագրելու: Քաղաքական գործիչները քննարկել են հիմնական հարցեր, այդ թվում՝ Ուկրաինայում զինված հակամարտության դադարեցումը:

Գագաթնաժողովից հետո Թրամփը հայտարարել է Ռուսաստանի, Ուկրաինայի և Միացյալ Նահանգների առաջնորդների միջև եռակողմ հանդիպման նախապատրաստման մեկնարկի մասին: Պուտինը, իր հերթին, ամերիկացի առաջնորդին հրավիրել է Մոսկվա։