«Չափազանց կարևոր է 44-օրյայի զեկույցի հրապարակը»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Օրինակ, դուք ուզո՞ւմ եք իմանալ, թե ինչպես ենք կորցրել Արարատը, Կարսը, Անին...
Անշուշտ, Արևելյան Հայաստանի (գրեթե միշտ և սխալմամբ Արևմտյան Հայաստան են գրում, ինչը սխալ է) այդ հողերի կորստի ու զավթման մասին շատ բան է գրվել, նաև ՀՀ հիմնադիր հայրերի գրիչով:
Հարյուր տարի անց մեր սերունդները փորձելու են հասկանալ, թե ինչու, ինչպես և ինչ պայմաններում ենք կորցրել Հադրութը, Շուշին, ամբողջ Արցախը:
Դրա համար շատ կարևոր են այն ուսումնասիրությունները, գրքերը, զեկույցները, ֆիլմերը, հարցազրույցները, որոնք հրապարակվում են այսօր: Դրանք կարող են լինել և են կողմնակալ, ոչ լիարժեք, մի կողմին սատարող, բայց կարևոր են ու անհրաժեշտ: Ինքս կարդացել եմ նման մի քանի գրքեր, մասնակցել մի քանիսի պատրաստմանը և ընդունում եմ, որ դրանք համակողմանի չեն:
Նույնչափ կարևոր է ԱԺ պատրաստած զեկույցը: Կասկած չկա, որ այն ևս կողմնակալ է, բայց դրանով հանդերձ չափազանց կարևոր է դրա հրապարակումը:
Հասկանալի է նաև, որ զեկույցի բազմաթիվ դրվագներ շահարկվելու են, մեջ են բերվելու ընտրողաբար, օգտագործվելու են մեկին կամ մյուսին սևացնելու նպատակով, բայց, այդուհանդերձ, դրա հրապարակումը անհրաժեշտ է:
Մտածում եք, որ զեկույցի հրապարակումով պետական գաղտնիքներ ե՞ք բացելու... Եթե այո, ապա նախ և առաջ մտահոգվեք ԱԺ-ից հնչող և ձեր սիրելի ոճով ասեմ՝ մեր հարևանների ջրաղացին ջուր լցնող հայտարարություններով: Կամ գործող ղեկավարի ու նախկին նախագահների տեքստերով»: