Թուրքիան արձագանքել է Թրամփի՝ ռուսական նավթից հրաժարվելու պահանջին

Թուրքիայի էներգետիկայի նախարար Ալփարսլան Բայրաքթարը հայտարարել է, որ ռուսական նավթ գնելու կամ չգնելու վերաբերյալ որոշումներ կկայացնեն մասնավոր թուրքական ընկերությունները։ Նա արձագանքել է ԱՄՆ նախագահ Դոնալդ Թրամփի պահանջին՝ դադարեցնել Ռուսաստանից վառելիք գնելը։

«Մինչ օրս մասնավոր հատվածն ինքն է կայացրել այս հարցի վերաբերյալ որոշումները, քանի որ դրանք առևտրային որոշումներ են։ Այսինքն՝ մենք երբեք ոչ մեկին չենք ասել՝ «Գնեք այստեղից, մի՛ գնեք այնտեղից»։ Մենք դա չենք արել մինչև օրս», - CNN Turk-ին ասել է Բայրաքթարը։
Հիշեցնենք՝ Դոնալդ Թրամփը հայտարարել է, որ Թուրքիան պետք է դադարեցնի ռուսական նավթի ներմուծումը մինչև Ուկրաինայի հակամարտության կարգավորումը։ Թուրքիայի նախագահ Ռեջեփ Թայիփ Էրդողանի հետ հանդիպումից հետո Թրամփը հայտարարել է, որ Անկարան կհրաժարվի Ռուսաստանից վառելիք գնելուց, եթե ինքը ցանկանա։