Թբիլիսիի կենտրոնը պարալիզացված է՝ բողոքի ակցիայի պատճառով

Թբիլիսիում շարունակվում է զանգվածային բողոքի ակցիան, որի ընթացքում ցուցարարները ամբողջությամբ փակել են քաղաքի գլխավոր՝ Ռուսթավելի պողոտան և Ազատության հրապարակը։

Այս շարժումն ակցիայի կազմակերպիչները բնորոշում են որպես «իշխանության խաղաղ տապալում» և «դրոշների խաղաղ հեղափոխություն»։ Ցույցը մեկնարկել է ուսանողական երթով, որին միացել են հազարավոր քաղաքացիներ։

Կազմակերպիչների խոսքով՝ հիմնական հանրահավաքը և ելույթները նախատեսվում են երեկոյան ժամերին։ Ցույցի մասնակիցներին նաև ներկայացվելու է հռչակագիր, որով կհայտարարվեն հետագա գործողությունների մասին։

Վրաստանի Ներքին գործերի նախարարությունը հորդորել է ակցիայի մասնակիցներին պահպանել օրենքը և ենթարկվել ոստիկանության օրինական պահանջներին։ Նախարարության տարածած հայտարարությունում նշվում է, որ օրենքի խախտման յուրաքանչյուր դեպք կհանգեցնի իրավական համապատասխան արձագանքի՝ ոստիկանության կողմից։

Բողոքի ակցիային կմիանան նաև Վրաստանի տարբեր մարզերից ժամանած ցուցարարներ։