««Տոմահավկ» հրթիռների հնարավոր մատակարարումն Ուկրաինային մտահոգիչ է»․ Պեսկով

Ամերիկյան «Տոմահավկ» հրթիռների հնարավոր մատակարարումը Ուկրաինային խիստ մտահոգություն է առաջացնում Մոսկվայում, հայտարարել է Ռուսաստանի նախագահի մամուլի քարտուղար Դմիտրի Պեսկովը։

««Տոմահավկ»-ի հարցը մեզ խիստ մտահոգություն է առաջացնում, ինչպես արդեն հայտարարել է նախագահ Պուտինը։ Սրանք հատուկ զենքեր են. դրանք կարող են լինել ոչ միջուկային կամ միջուկային։ Զենքերն ունեն մեծ հեռահարություն, լուրջ ազդեցություն», - ասել է Պեսկովը Պավել Զարուբինի հետ հարցազրույցում։

Միևնույն ժամանակ, «Տոմահավկ» հրթիռը չի կարող փոխել իրավիճակը առաջնագծում, ասել է Ռուսաստանի նախագահի մամուլի քարտուղարը։ Նրա խոսքով՝ լարվածությունն այժմ սրվում է բոլոր կողմերից։ Ռուսաստանը շարունակում է հայտարարել ուկրաինական հակամարտության խաղաղ կարգավորման իր պատրաստակամության մասին։

Պեսկովը հավելել է, որ ԱՄՆ նախագահ Դոնալդ Թրամփը անընդհատ խոսում է բանակցությունների սեղանի շուրջ նստելու անհրաժեշտության մասին։ Սակայն Ուկրաինան և Եվրամիությունը ցուցաբերում են բացարձակ դժկամություն իրավիճակը կարգավորելու համար որևէ բան անելու հարցում։