Պակիստանի նախագահը Թրամփին վերստին առաջադրել է Խաղաղության Նոբելյան մրցանակի

Պակիստանի վարչապետ Շեհբազ Շարիֆը հայտարարել է ԱՄՆ նախագահ Դոնալդ Թրամփին վերստին Խաղաղության Նոբելյան մրցանակի առաջադրելու մասին՝ Մերձավոր Արևելքի հակամարտությունը լուծելու ջանքերի համար։
Ինչպես հայտնել ենք, երկուշաբթի օրը Եգիպտոսի Շարմ էլ Շեյխ քաղաքում տեղի ունեցավ Գազայում պատերազմը դադարեցնելու գագաթնաժողով, որտեղ Եգիպտոսի, ԱՄՆ-ի, Կատարի և Թուրքիայի առաջնորդները ստորագրեցին Գազայի հատվածում հակամարտությունը դադարեցնելու փաստաթուղթ։ «Այսօր ժամանակակից պատմության մեծագույն օրերից մեկն է, քանի որ խաղաղությունը ձեռք է բերվել անխոնջ ջանքերի շնորհիվ, նախագահ Թրամփի գլխավորած ջանքերի շնորհիվ, ով իսկապես խաղաղության մարդ է, ով ամիսներ շարունակ, օրեցօր անխոնջ և անընդհատ աշխատել է այս աշխարհը խաղաղության և բարգավաճման վայր դարձնելու համար»,- ասել է Շարիֆը գագաթնաժողովից հետո իր հանպատրաստից ելույթում։
Նա հիշեցրել է, որ Պակիստանը նախկինում նախագահ Դոնալդ Թրամփին առաջադրել էր Խաղաղության Նոբելյան մրցանակի։ «Այսօր ես կցանկանայի ևս մեկ անգամ առաջադրել այս ուշագրավ նախագահին Նոբելյան խաղաղության մրցանակի, քանի որ անկեղծորեն հավատում եմ, որ նա Խաղաղության մրցանակի ամենաանկեղծ և ուշագրավ թեկնածուն է։ Ի վերջո, նա ոչ միայն խաղաղություն բերեց Հարավային Ասիա և փրկեց միլիոնավոր մարդկանց կյանքը, այլև այսօր, այստեղ՝ Շարմ էլ Շեյխում, Գազայում խաղաղության հասնելը փրկում է Մերձավոր Արևելքի միլիոնավոր մարդկանց կյանքը»,- նշել է Շարիֆը։