Մեծ Բրիտանիան ամբողջությամբ վերացնում է Հայաստանի և Ադրբեջանի նկատմամբ զենքի էմբարգոն

Մեծ Բրիտանիայի խորհրդարանի կայքում հրապարակվել է Եվրոպայի և Հյուսիսային Ամերիկայի հարցերով պետական նախարար Սթիվեն Դոութիի հայտարարությունը՝ Ադրբեջանի և Հայաստանի նկատմամբ զենքի մատակարարման էմբարգոյի վերացման վերաբերյալ։
Հայտարարության մեջ մասնավորապես նշվում է.
«Օգոստոսի 8-ին Վաշինգթոնում տեղի ունեցավ եռակողմ գագաթնաժողով՝ ԱՄՆ նախագահ Դոնալդ Թրամփի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի միջև։ Արդյունքում նախաստորագրվեց խաղաղության պայմանագիր և ստորագրվեց հռչակագիր։
Մեծ Բրիտանիան ողջունում է ձեռք բերված առաջընթացը։ Սա կարևոր քայլ է դեպի խաղաղություն և կայունություն։
Այդ կապակցությամբ մենք բարձրացնում ենք Հայաստանի և Ադրբեջանի հետ մեր հարաբերությունների մակարդակը մինչև ռազմավարական գործընկերության՝ առևտրի, անվտանգության և պաշտպանության ոլորտներում։
Հաշվի առնելով արձանագրված առաջընթացը՝ կարծում ենք՝ 1992 թվականի ԵԱՀԿ զենքի արգելքն այլևս արդիական չէ: Մենք կհետևենք տարածաշրջանում տիրող իրավիճակին»։