«Դո՛ւք «արարեցիք» նիկոլիզմը՝ ամեն արժեք ոտնատակ տալով»․ Վահե Լոռենց

Պատմաբան, գրող, հրապարակախոս Վահե Լոռենցի ֆեյսբուքյան գրառումը․ «Հորս արև, քեֆ ենք անում, լավ ենք անում․․․
Հայաստանյան հասարակության 21-րդ դարի առաջին քառորդի արժեհամակարգը։
Իհարկե՛, սա ոչինչ է 2020 թվականի դեկտեմբերյան հրավառությունների ֆոնին, սա ոչինչ է Եռաբլուրը քաղաքականացնելու, այնտեղ «Նիկոլ՝ վարչապետ» գոռալու, որդեկորուստ մայրերին քաշքշելու համեմատ։
Ուղղակի՝ երբեք այլևս չպարծենաք զատոներով, չպարծենաք Կոմիտասով, Խաչատրյանով, հայության այն մեծերով, որոնք ձեզ հետ որևէ աղերս չունեն։ Երբեք չքննադատեք օտարին, թշնամուն, հայության արժեքները յուրացնելու համար, մեզ ամենուր նվաստացնելու համար։
Դուք միայն կարող եք գոռալ՝ Զատո, հորս արև, քեֆ ենք անում, լավ ենք անում»։
Մեկ էլ․ աչքովս ընկան քաղաքական այս թատրոնում ընդդիմության դերը շատ վատ կատարող մի քանի գործիչների քննադատական գրառումներ։ Ինչպես կասեր ձեր իսկ «մեծ դասականը»՝ Յա, իրո՞ք։
Դո՛ւք եք մեր հասարակությանն այսպիսին կերտել․․․ Դո՛ւք Ժողովրդական արտիստի, Վաստակավոր արտիստի կոչումներ աջ ու ձախ բաժանեցիք, պետական մրցանակների արժանացրիք այն «արժանավորներին», որոնք հակամշակույթ սերմանեցին Հայաստանում և կերտեցին ներկա հայ հասարակությանը։ Դու՛ք «արարեցիք» նիկոլիզմը։ Դո՛ւք։ Դուք դա արեցիք դպրոցը քանդելով, հեռուստաեթերից աղբ սփռելով, ամեն արժեք ոտնատակ տալով, և այսօր դժգոհո՞ւմ եք՝ վայելելով ձեր ցանածի պտուղները։ Բարո՛վ վայելեք․․․»: