«Սա հարձակում է մեր արժանապատվության, արժեքների և ազգային միասնականության դեմ»․ Մհեր Մելքոնյան

ԱԺ «Հայաստան» խմբակցության պատգամավոր Մհեր Մելքոնյանի ֆեյսբուքյան գրառումը․ «Հայաստանում իրավական պետության հիմքերը փաշինյանական խմբակի կողմից թուլացվում են հետևողական, ցինիկ և համակարգված կերպով։
Այսօր Արագածոտնի թեմում իրականացված իրավապահների գործողությունները և հոգևորականների ձեռբակալությունները չեն կարող դիտարկվել իրավական գործընթացի շրջանակներում։
Դրանք հանդիսանում են գործող ռեժիմի հստակ քաղաքական ուղեգիծ՝ միտված Եկեղեցու արժեզրկմանն ու նրա՝ հասարակական կյանքում ունեցած դերի սահմանափակմանը։
Սա մեկուսացված միջադեպ չէ, այլ շղթայի մաս՝ որի թիրախն է ազգային ինքնության, պատմական հիշողության, հանրային համախմբման հիմքերը կազմող ինստիտուցիոնալ կառույցների կազմաքանդումը։
Ուշագրավ է, որ այն, ինչի մասին տարիներ շարունակ երազել են Հայաստանյայց Առաքելական Սուրբ Եկեղեցու թշնամիները, այսօր կյանքի է կոչվում հենց Հայաստանի Հանրապետության ներսից՝ գործող ապազգային իշխանության մակարդակով։
Եկեղեցու դեմ տարվող այս մերժելի գործընթացները ոչ միայն սպառնալիք են մեր հոգևոր ինքնությանը, այլ նաև վկայում են պետության կառավարման խոր ճգնաժամի մասին։
Հայաստանյայց Առաքելական Սուրբ Եկեղեցու դեմ ուղղված վերջին զարգացումները նոր ազդակ են այն մտահոգիչ իրողության, որ իշխանություններն այլևս չի առաջնորդվում ազգային շահերի և պատմական պատասխանատվության զգացումով։
Եկեղեցին մեր ինքնության անկյունաքարն է, և նրա դեմ իրականացվող ամեն հարձակում՝ կլինի դա ուժային, քարոզչական թե վարչական, դիտարկվում է որպես հարձակում մեր արժանապատվության, արժեքների և ազգային միասնականության դեմ։
Հ.Գ. «Ով պայքարում է եկեղեցու դեմ, հավիտենական դատապարտության ու ամոթի խարանով պիտի հիշվի պատմության մեջ»»։