«Պաշտպանական կողմի դիրքորոշումները ներկայացնելու փուլն ավարտեցինք»․ Արամ Վարդևանյան

«Պաշտպանական կողմի դիրքորոշումները ներկայացնելու փուլն ավարտեցինք․ բոլոր պաշտպաններով մանրակրկիտ ներկայացրինք մեր փաստարկները»,- այս մասին Հակակոռուպցիոն դատարանի բակում լրագրողների հետ զրույցում հայտնեց փաստաբան Արամ Վարդևանյանը։ «Հաստատապես կարող եմ ասել, որ եթե ունենանք ողջամիտ հնարավորություն իրական իրավաբանության և արդարադատության, ապա միանշանակ է, որ պետք է այս միջնորդությունը մերժվի,- նշեց Վարդևանյանը՝ միաժամանակ ընդգծելով, որ փաստաբանների ակնկալիքի նշաձողը բավականին ցածր է։ «Չենք ուզում 100 տոկոս ծավալի իրավաբանություն, որովհետև միամտություն կլինի կարծել, թե դա կարող է իրականացվել այսօրվա պայմաններում»,- հավելեց նա։

Նշենք, որ Հակակոռուպցիոն դատարանում շարունակվում է գործարար Սամվել Կարապետյանի կալանքը երկարաձգելու միջնորդության քննության դատական նիստը, երեկ այն հետաձգվել էր: Նիստը նախագահում է դատավոր Վահե Դոլմազյանը։

Հիշեցնենք՝ Սամվել Կարապետյանին նոր մեղադրանք է առաջադրվել՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ առանձնապես խոշոր չափերով փողերի լվացում կատարելը։ Այս մասին լրատվամիջոցներին հայտնել էին ՔԿ-ից։
Սամվել Կարապետյանին մեղադրանք է առաջադրվել Քրեական օրենսգրքի 290 (Հարկերը, տուրքերը կամ այլ վճարներ չվճարել), 296 (Փողերի լվացում), 422 (Իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը) հոդվածներով։ Վերջիններիս ավելացել է ՔՕ 296-րդ հոդվածի 3-րդ մասի 2-րդ և 3-րդ կետերով նախատեսված մեղադրանքը։