Շարունակվում է Սամվել Կարապետյանի կալանքը երկարաձգելու միջնորդության քննությունը․ Ուղիղ միացում դատարանի բակից

Հակակոռուպցիոն դատարանում շարունակվում է գործարար Սամվել Կարապետյանի կալանքը երկարաձգելու միջնորդության քննության դատական նիստը, այն նախագահում է դատավոր Վահե Դոլմազյանը։

Հակակոռուպցիոն դատարանում միջնորդության քննությունը սկսվել է երեկ՝ ժամը 18։00-ից։ Այնուհետև կեսգիշերն անց՝ ժամը 02։00-ին, ընդմիջում հայտարարվեց։ Նիստը շարունակվեց այսօր։ Այդ ողջ ընթացքում դատարանի բակում շարունակում են հավաքված մնալ բազմաթիվ քաղաքացիներ՝ հաջակցություն Սամվել Կարապետյանի։

«Պաշտպանական կողմի դիրքորոշումները ներկայացնելու փուլն ավարտեցինք․ բոլոր պաշտպաններով մանրակրկիտ ներկայացրինք մեր փաստարկները»,- այս մասին քիչ առաջ Հակակոռուպցիոն դատարանի բակում լրագրողների հետ զրույցում հայտնեց փաստաբան Արամ Վարդևանյանը։

Հիշեցնենք՝ Սամվել Կարապետյանին նոր մեղադրանք է առաջադրվել՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ առանձնապես խոշոր չափերով փողերի լվացում կատարելը։ Այս մասին լրատվամիջոցներին հայտնել էին ՔԿ-ից։
Սամվել Կարապետյանին մեղադրանք է առաջադրվել Քրեական օրենսգրքի 290 (Հարկերը, տուրքերը կամ այլ վճարներ չվճարել), 296 (Փողերի լվացում), 422 (Իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը) հոդվածներով։ Վերջիններիս ավելացել է ՔՕ 296-րդ հոդվածի 3-րդ մասի 2-րդ և 3-րդ կետերով նախատեսված մեղադրանքը։