«Քրեականացումը չի կարող հետին ամսաթվով դիտարկվել»․ Երեմ Սարգսյան

«Մկրտիչ Սրբազանին մեղսագրվող հոդվածներից մեկն այն պահին, իբր երբ որ ենթադրյալ արարքը կատարել է, հանցագործություն չի հանդիսացել: Իրենք ասում են՝ 2021 թվականին դու հարկադրել ես, որպեսզի ընտրության մասնակցի և կոնկրետ անձի չընտրի: 2021 թվականին դա հանցագործություն չի եղել: 2022 թվականի օրենսգրքով նոր վերածվել է հանցագործության: Իսկ օրենքը պարզ է, եթե կոնկրետ արարքի կատարման ժամանակ դա հանցագործություն չի, ապագայի քրեականացումը չի կարող հետին ամսաթվով գնալ և դիտարկվել,- դատարանի բակում լրագրողների հետ զրույցում հայտնել է փաստաբան Երեմ Սարգսյանը և ընդգծել, որ «մյուս հոդվածով էլ իրենք ասում են, որ դու կոնկրետ մեթոդների կիրառմամբ քո ծառայողական լիազորությունների գործադրմամբ հարկադրել ես հավաքի մասնակցել, բայց չկարողացան ցույց տալ օրենքով նախատեսված, թե ինչ եղանակով է հարկադրումը կատարվել: Այսինքն՝ ընդամենը խոսքեր, որ հանցագործություն է կատարվել, բայց թե այդ հանցագործությունը ոնց է դրսևորվել, հանցավոր որևէ հատկանիշ չկար»:

Անդրադառնալով խուզարկությունների ընթացքում հայտնաբերված գումարին՝ փաստաբանը նշել է, որ այդ գումարների մասին մեղադրանք էլ չկա: «Շատ բնական է, որ թեմի առաջնորդարանում գումար կա, որովհետև բազմաթիվ ծախսեր կան, որոնք պետք է հոգացվեն: Փորձում են չեղած տեղը տպավորություններ ստեղծել»,-ասել է նա: