Պեսկովը հրաժարվել է պատասխանել Ասադի ճակատագրի վերաբերյալ հարցին

Ռուսաստանի նախագահի մամուլի քարտուղար Դմիտրի Պեսկովը հրաժարվել է պատասխանել այն հարցին, թե արդյոք Սիրիայի նախագահ Ահմեդ ալ-Շարաան և նախագահ Վլադիմիր Պուտինը քննարկել են Մոսկվայում ապաստանած Բաշար ալ-Ասադի ճակատագիրը։

Ըստ «Կոմերսանտի»՝ Պեսկովը ճեպազրույցի ժամանակ ասել է, որ Կրեմլը որևէ մեկնաբանություն չունի այն մասին, թե արդյոք Ասադը կարտահանձնվի Դամասկոսին։

Վլադիմիր Պուտինի և Ահմեդ ալ-Շարաայի միջև բանակցությունները տեղի են ունեցել Կրեմլում նախորդ օրը։ Սա երկու քաղաքական գործիչների առաջին հանդիպումն էր և տևել է երկուսուկես ժամ։ Պեսկովը նշել է, որ Պուտինի և Ահմեդ ալ-Շարաայի բանակցությունների օրակարգում էր Սիրիայում գտնվող ռուսական ռազմաբազաների ճակատագիրը, առանց մանրամասներ հաղորդելու։

Ըստ գերմանական «Zeit» թերթի՝ Բաշար ալ-Ասադն այժմ իր ընտանիքի հետ ապրում է «Մոսկվա-Սիթի» համալիրում։