101 տարեկանում մահացել է Ճապոնիայի նախկին վարչապետը

Ճապոնիայի նախկին վարչապետ Տոմիիչի Մուրայաման, ով առավել հայտնի է 2-րդ համաշխարհային պատերազմի համար ներողություն խնդրելու հայտարարությամբ, մահացել է ուրբաթ օրը 101 տարեկան հասակում։
Մուրայաման հայտնի է 1995 թվականին հրապարակված իր հայտարարությամբ, որով նա պաշտոնապես ներողություն էր խնդրել Ասիայի այն բոլոր երկրներից, որոնք տուժել են ճապոնական գաղութատիրության և ագրեսիայի հետևանքով: «Հուսով եմ, որ ապագայում նման սխալ չի կրկնվի, ես կրկին արտահայտում եմ իմ խորը զղջման զգացումները և իմ սրտանց ներողությունը», - նշել էր նա։

«Խորը զղջում» և «սրտանց ներողություն» արտահայտությունները օգտագործվել են Ճապոնիայի հաջորդ վարչապետների կողմից Երկրորդ համաշխարհային պատերազմի 60-րդ և 70-րդ տարեդարձերը նշելիս։