Չորեքշաբթի, 22 հոկտեմբերի, 2025 թ.
|
Ստեփանակերտում`   +10 °C

«Այս ձևով մոտենում ենք քաղաքացիական պատերազմի»․ Թաթուլ Հակոբյան

«Այս ձևով մոտենում ենք քաղաքացիական պատերազմի»․ Թաթուլ Հակոբյան
186
Այսօր, 00:48

Լրագրող Թաթուլ Հակոբյանի ֆեյսբուքյան գրառումը. «Ամեն իշխանություն պետք է մտածի, թե ինչպես է հեռանալու և ինչպես է մնալու պատմության մեջ: Արխիվային նյութերի հետ աշխատանքն է ինձ բերել այս մտքին: Վերաբերմունքը նախկինների հանդեպ փոփոխական է, ամեն մի սերունդ իր ձևով է ընկալում:
1920 թվականի վերջերին ՀՅԴ-ն իշխանությունը Հայհեղկոմին՝ բոլշևիկներին փոխանցեց կուսակցության Բյուրոյի որոշումով՝ խաղաղ ճանապարհով: Բոլշևիկները, կարճ ժամանակ անց, սկսեցին հալածանքներն ու քաղաքական սպանությունները:
1990-1991 թվականներին իշխանափոխությունը Հայկոմկուսից Հայոց համազգային շարժմանն անցավ խաղաղ ճանապարհով՝ ընտրությունների միջոցով: Գոյություն ունեցող ԽՍՀՄ-ում Հայկոմկուսը ընտրություններում պարտվեց ՀՀՇ-ին:
ՀՀՇ-ից և Լևոն Տեր-Պետրոսյանից իշխանությունը Ռոբերտ Քոչարյանին/ՀՀԿ-ՀՅԴ-ին 1998 թվականին անցավ «խաղաղ հեղաշրջման» ճանապարհով:
Ռոբերտ Քոչարյանը Սերժ Սարգսյանին իշխանությունը փոխանցեց Մարտի 1-ի արյունահեղության միջոցով:
Սերժ Սարգսյանը համաժողովրդական ալիքի տակ հեռացավ, և իշխանության եկավ (որոշներն ասում են՝ բերեց) Նիկոլ Փաշինյանը:
ՔՊ-ն և Փաշինյանը մի օր հեռանալու են, ինչպես հեռացել են նախկին իշխանությունները:
Ինձ մտահոգում է այն անհանդուժողականությունը, որ կա Հայաստանում: Վերջին հինգ տարիների վերջ չունեցող պարտություններից հետո հատկապես պետք է զերծ մնանք ներքաղաքական առճակատումից: Այս ձևով մենք մոտենում ենք քաղաքացիական պատերազմի»:

Աղբյուրը`   Թաթուլ Հակոբյան