«Այն եկեղեցիները, որտեղ չկա հոգևոր կյանք, կվերադարձնենք հանրությանը»․ Նիկոլ Փաշինյան

«Պարզապես ուզում եմ միանալ այն համայնքին, որի հոգևոր հովիվը Տեր Արամ Ասատրյանն է»,- ԱԺ-ում հայտարարեց վարչապետ Նիկոլ Փաշինյանը՝ անդրադառնալով կարգալուծ եղած քահանայի՝ Հովհաննավանքում մատուցած պատարագին մասնակցելու ցանկությանը։ «Կարգալուծը չի կարող կարգալույծ անել։ Կտրիճ Ներսիսյանը ո՞նց կարող է մարդ կարգալույծ անել, եթե ինքը վաղուց կարգալույծ է։ Նա մարդ է, ով բռնազավթել է Մայր Աթոռը՝ իր նման մի խումբ կարգալույծ խմբակի հետ»,- հավելեց Փաշինյանը։
Նրա խոսքով՝ «վարկաբեկման ապարատը, որ գործում է Կտրիճ Ներսիսյանի գլխավորությամբ», չկարողացավ որևէ կերպ վարկաբեկել Տեր Արամի հոգևոր գործունեությունը․ «Եվ դա հիմնավորում է, որ այն մարդիկ, ովքեր ուզում են հոգևոր կյանքով ապրել, կարող են Հովհաննավանքում հոգևոր կյանքով ապրել։ Եթե ճիշտ գիտեմ, Հովհաննավանքը գտնվում է Կառավարության հաշվեկշռում։ Մի շարք եկեղեցիներ անհատույց օգտագործման են տրված ՀԱԵ-ին։ Կարծում եմ՝ որտեղ չկա հոգևոր կյանք, այլ կա խարդավանքներ, ֆեյք երեցների խմբեր են գործում, կարող ենք այդ հուշարձանները վերադարձնել հանրությանը և Տեր Արամին ու նրա նման քահանաներին աջակցենք՝ ՀՀ-ում վերականգնել հոգևոր կյանքը»,- ասաց Փաշինյանը։