«Չցուցաբերեցին միասնականություն»․ Արա Պողոսյան

Քաղաքագետ Արա Պողոսյանը ֆեյսբուքյան էջում գրել է․ «Այսօր Հայկական աշխարհը համախմբող երկու մարմին՝ Հայ Առաքելական Սուրբ Եկեղեցին և Մեծի Տանն Կիլիկիո Կաթողիկոսությունն են, որ մնացել են հայկական ինքնությանն ու ազգային արժեքային ավանդին կառչած։ Ցավոք սրտի, ո՛չ Հայ Կաթողիկէ Եկեղեցին, և ո՛չ էլ Հայ Ավետարանական եկեղեցին չցուցաբերեցին միասնականություն ազգային քրիստոնեական և մյուս հարցերում։ Սա ազգային պառակտվածության հոգևոր ասպեկտն է, իսկ քաղաքական ասպեկտն անխոս գալիս է Հայաստանի Հանրապետության իշխանական վերնախավի քաղաքական և մարդկային վարքագծից։
Ազգային միասնությունն այն ճանապարհն է, որն ի զորու է վերականգնել հավատքն ազգային ուժերի նկատմամբ, վերաձևել Հայկական աշխարհն ու Հայկական աշխարհի տեղն ու դերը ժամանակակից պատմության մեջ, զորացնելով հայկական փափուկ ուժի (soft power), տնտեսական ուժի, կոշտ ուժի (hard power) ռեսուրսները և հայկական գործոնը դարձնելով համաշխարհային գործոն։
Արդյո՞ք սա իրագործելի է, թե՞ պատրանք է, երազանք, որն անտիկ փիլիսոփաները կկոչեին ուտոպիա։
Վստահաբար, սա իրագործելի գաղափար է, որն իր մասնավոր հնարավորությունը մեկ անգամ չէ, որ դրսևորել է։ Այդ մասին են վկայում նաև անալոգային համեմատական վերլուծությունները համանման կամ մոտ կարգավիճակ ու ռեսուրսներ ունեցող ժողովուրդների ու պետությունների հետ։
Մենք կանք, մենք կարող ենք, եթե կարողանանք իբրև հայ, իբրև ազգակից ու արյունակից իրար լսել, իրար հետ խոսել ու երկխոսել․․․
Հ․Գ․ Ու խոսքը անձերի մասին չէ։ Չկա անխոցելի անձ, անսխալ անձ, այլ խոսքը մեր հավաքականության մասին է»։