««Պետություն չենք ունեցել» կոչերով ավիրեցիք եղածը»․ Վահրամ Մարտիրոսյան

Գործարար Վահրամ Մարտիրոսյանի ֆեյսբուքյան գրառումը. «Եկեղեցուն քննադատողներդ՝ սեփական պատմությունից գոնե տեղյա՞կ եք։
Գիտե՞ք, որ Եկեղեցին երբեք էլ իդեալական չի եղել․ նույնիսկ իր ստեղծման օրը իդեալական չի եղել։ Այդ հսկայական կառույցը չի էլ կարող առանց թերությունների լինել։ Նույնը՝ մեր բանակը չէր կարող լինել իդեալական, ինչպես նաև մեր պետությունը։
«Պետություն չենք ունեցել» կոչերով՝ դրական փոփոխությունների փոխարեն ավիրեցիք եղածը։ Պետության կեսը թշնամուն հանձնեցիք, պետականության կորուստն էլ մազից եք կախել։
«Բանակ չենք ունեցել» կոչերով ևս՝ կառուցելու փոխարեն ավիրեցիք եղածը։
Իսկ դուք Տիգրան Մեծի մասին լսե՞լ եք, թե՞ կարդացել։ Գիտեք, որ ինքն էլ, մեղմ ասած, իդեալական չի եղել։ Բայց նրա թերություններով հանդերձ՝ Տիգրանը, միևնույն է, ինձ համար Մեծ է։
Կամ տեսե՞լ եք Կաթոլիկ Եկեղեցու ներկա վիճակը։ Մեր Եկեղեցին մի քանի մակարդակով ավելի լավ վիճակում է։ Բա ինչո՞ւ Իտալիայում ու ամբողջ աշխարհում ձեր նման չեն հարձակվում Վատիկանի և Հռոմի պապի վրա։ Թե գուցե դուք «նիկոլական բոլշևիկ» եք, իսկ իտալացիներն ու քրիստոնյա աշխարհի մեծամասնությունը՝ ոչ։
«Նիկոլի Ավրորան» կրակեց - արա՜գ վազեք ու ավիրեք։
Յուրաքանչյուր իրեն ընդդիմադիր համարողը թող հանձնի «նիկոլականության» թեստ և պատասխան տա նիկոլիզմի երեք հիմնական նարատիվներին․
1. Արդյո՞ք պարտությունը և Արցախի կորուստը համարում եք անխուսափելի։
2. Պետություն ունեցել ենք, թե՞ ոչ։
3. Բանակ ունեցել ենք, թե՞ ոչ։
Ինչքան շուտ բացահայտես քո մեջի «Նիկոլը», այնքան քեզ համար ավելի լավ ու օգտակար»։