«Տեսնելով հայհոյանքներ տվող կանանց, որպես գյումրեցի, ամոթից գետինն էի մտնում»․ Կարեն Սարուխանյան

ՔՊ-ական պատգամավոր Կարեն Սարուխանյանի ֆեյսբուքյան գրառումը․ «Օրեր առաջ ենթադրյալ կաշառակերության գործով ձերբակալվեց, այնուհետև կալանավորվեց Գյումրու համայնքապետի ժամանակավոր տեղապահ՝ բոլորիդ հայտնի Վարդանիգը։
Այն, որ Վարդանիգը հնարավոր է նմանատիպ քայլերի գնար՝ բոլորիս հայտնի էր, այն, որ Վարդանիգը երկար չէր կարող այլ աշխատաոճով աշխատեր և իր ժամանակներին էր վերադառնալու՝ ես և Գյումրեցիները սպասում էինք, և բազմիցս խոսել եմ այդ մասին՝ հիշելով իր կառավարման տարիներին Գյումրիում տիրող իրավիճակը։
Այն, որ Վարդանիգը նմանատիպ քայլերի էր գնալու և ամեն ինչ անելու էր, որ իր ենթադրյալ հանցանքը կոծկի՝ քաղաքական աստառ տալով, դա՜ էլ էր հասկանալի։
Բայց ինձ այդպես էլ անհասկանալի մնաց, թե Վարդանիգի «Կողքս լցվեք»-ի մասին կոչին հետևելով՝ ինչպե՞ս կարող էին գյումրեցիները դուրս գալ և նույնիսկ հրապարակում ենթադրյալ խուլիգանական վարքագիծ դրսևորեին, որը գյումրեցուն բնորոշ չէ, որը մեզ բացարձակ սազական չէ։
Տեսնելով այն հայտնի կանանց, որոնք վերջին հայհոյանքներն էին տալիս՝ որպես գյումրեցի, ամոթից գետինն էի մտնում, դա՜ խայտառակություն է, դա մեր դեմքը չէ որպես Քաղաք, դա Գյումրեցունը չէ։
Այդ «Կողքս լցվեք»-ի օպերացիան ենթադրում եմ, որ նախապես պլանավորված է եղել, և Վարդանիգը հրապարակային ասում էր այդ մասին։
Եւ ովքե՞ր էին լցվելու Վարդանիգի կողքը՝ բնականաբար ստիպելու էին համայնքապետարանի և ենթակա կառույցների աշխատակիցներին, որպեսզի Վարդանիգի կալանավորման, աշխատակիցների անօրինական հրահանգների հետևանքով տրված իրավական գնահատականների արդյունքում՝ քաղաքի համապատասխան ոլորտները չգործեին, քաղաքը կոլապսի ենթարկվեր, ինչի մասին ձերբակալությունից անմիջապես հետո անկեղծացավ Վարդանիգի փեսան՝ առաջին տեղակալը։
Բայց համայնքապետարանի աշխատակիցները պե՜տք է գիտակցեին, որ պաշտոնական դիրքի չարաշահումների և անօրինական հրահանգների արդյունքում հետևելու են իրավական գործընթացներ։
Այն, որ ձերբակալվել է զոքանչս՝ հաստատում եմ, բայց բնականաբար ոչ Վարդանիգին աջակցելու համար, այլ որպես համայնքային ծառայության առաջատար մասնագետ, ով պահի և վերադասի ճնշման ազդեցության տակ կատարել է ենթադրաբար անօրինական հրահանգ, ինչը, բնականաբար, ըստ ինձ՝ չպետք է կատարեր։
Հայաստանի Հանրապետությունը իրավական պետություն է, և օրենքի առաջ բոլորն են հավասար»։